Ижтимоий тармоқларда фарғоналик 66 ёшли отахон велосипедда Ҳажга боргани ҳақида хабарлар тарқалди. Отахоннинг қарийб уч ойлик сафари билан боғлиқ қизиқ маълумотларни эшитиб, хонадонига бордик. Йўл машаққатлари ва зиёрат таассуротлари ҳақида суҳбатлашдик.
Аҳатали Маҳкамов Фарғона вилоятининг Бағдод туманидаги Хитой қишлоғида яшайди. Ёшлигидан велосипедда саёҳат қилишга қизиқади. Ҳажга велосипедда боришни ният қилгач, бу юмуш билан астойдил шуғуллана бошлаган. Уч йил давомида Бағдод туманидан Марғилон шаҳригача бўлган 60-70 километр масофани велосипедда босиб ўтишга кўниккан. Шундан сўнг узоқроқ масофага саёҳат қилиб, ўзини синаб кўришга қарор қилган. Аввал Тошкент, кейин Самарқандга велосипедда қилинган сафарлар отахоннинг ўзига бўлган ишончини мустаҳкамлаган.
Отахон 2022 йилнинг июнь ойида яхши ният билан Умра зиёратига отланади. Тожикистон, Қозоғистон, Россия, Грузия ва Туркия орқали 57 кун йўл юриб Макка шаҳрига етиб боради.
Ёшлигимдан велосипед минишга қизиқаман. Бирор жойга бормоқчи бўлсам, енгил машина ё жамоат транспортидан кўра велосипедда юришни афзал кўраман. Кўпдан бери Ҳаж сафарига ҳам велосипедда боришни ният қилардим. Бу ниятимни амалга ошириш учун йиллар давомида машқ қилдим. Уч йил уйдан Марғилон шаҳрига велосипедда қатнадим. Орадаги масофа бир томонга қарийб 60-70 километрни ташкил қилади. Шундан сўнг ўзимни синаб кўриш учун Тошкент ва Самарқанд шаҳарларига саёҳат қилдим. Бу сафарлардан кейин ўзимга нисбатан ишонч пайдо бўлди, Саудияга бораман, деган қарорга келдим.Тайёргарлик ишларини тугатиб, яхши ният билан Учкўприк туманида яшовчи шеригим билан сафарга отландик. Июннинг бошларида йўлга чиқиб, шу ойнинг 13-кунида Тожикистон чегарасидан ўтдик. Хоразм, Қорақалпоғистон орқали Қозоғистонга бордик. Қозоғистон бўйлаб узоқ юрганимиздан кейин Россияга қатнайдиган юк машиналарига дуч келдик. Ҳайдовчилар Марғилондан экан. Бизни тўхтатиб, қувват бўлади, йўлда чарчамай юрасизлар деб, новвот чой билан меҳмон қилишди. 10 километрдан кейин қумлик саҳро келади, у ерларда велосипедда юриб бўлмайди, дейишди. Кейин шерикларига телефон қилиб, икки киши Умра зиёратига кетяпти, уларни ўша қумликлардан ўтказиб қўйинглар, деб айтишди. Айтилган жойга етиб бордик, наманганлик йигитлар экан, бизни қумликлардан ўтказиб қўйишди.
Россия чегарасидан велосипедда ўтишга рухсат беришмади. Пиёдаларга йўл йўқ экан. Чегарадан поездда ўтиб олдик. Ундан кейин Чеченистонгача велосипедда етиб бордик. Ўша ерда велосипедим бузилиб қолди. Чечен дўстларимиз уни тузатишга анча ҳаракат қилишди, лекин иложи бўлмади. Кейин уларнинг таклифи билан шу ерда қолиб, Қурбон ҳайити намозини ўқидик. Эртасига чечен дўстимиз мени супермаркетга олиб бориб, янги велосипед совға қилди. Энди Умрага шу велосипедни миниб бориб, Каъбага қараб мени дуо қилиб қўясан, деди. Эски велосипедимни ўша ерда қолдирдим.
Грузия орқали Туркияга ўтдик. Истанбулга бориб, самолётга чипта харид қилиб, Жиддага учдик. Яна велосипедимизни миниб, Жиддадан Маккага йўл олдик. Аллоҳга шукур, 57 кун йўл юриб, Каъбага етиб бордик. У ерда Умра амалларини бажариб, юртимизга тинчлик, хонадонларимизга қут-барака сўраб дуолар қилдик. Ўша кунлари президентимиз Каъбаттулоҳни зиёрат қилиб, Умра амалларини бажарди. Президентимиз борганларини кўриб, хурсанд бўлдик, фахрландик. Макка шаҳрида 25 кун бўлдик, кейин Мадинани зиёрат қилдик.
Йўлда қийинчиликлар, синовлар ҳам кўп бўлди. Тилни яхши билмаймиз, имо-ишоралар орқали фикримизни тушунтиришга ҳаракат қилдик. Бахтимизга, борган жойларимизда яхши одамларга дуч келдик. Тунашга жой беришди, меҳмон қилишди. Қийин вазиятларда ёрдам кўрсатишди. Бошида телефондаги харитага қараб йўл юрдик. Кейин уни ишлатмай қўйдик, сўраб-сўраб Маккага етиб олдик», — дейди Аҳатали Маҳкамов.
Мавзуга доир: Олмаоталик велосипедда ҳажга йўлга чиқди
Изоҳ (0)