«Қўқонда 750 минг сўм ойликка ўқитувчилик қилардим» — Даврон Асқаров танилгунига қадар кечирган қийинчиликлари ҳамда Мирза Азизовдан қаттиқ тарсаки егани ҳақида сўзлаб берди (фото, видео)

«Қодирхон» сериалидаги роли билан томошабинларга яхши таниш бўлган актёр Даврон Асқаров «Дарё» интернет нашрининг YouTube каналига берган интервьюсида аслида мактабда мусиқа ўқитувчилик қилгани, отаси сабаб кастингда иштирок этгани ва устози Мирза Азизов ҳақидаги хотираларини сўзлаб берди.

— Аслида актёр эмасман. Мусиқа соҳасида таҳсил олиб, Қўқондаги 31-мактабда 7-синфгача мусиқа ўқитувчиси бўлиб ишлаганман. Яратган сабабчи бўлиб, актёрлик соҳасига кириб келдим. Илк ролимни «Адвокатлар» номли сериалда ижро этганман. 70 қисмдан иборат сериал менга омад олиб келмади. Сериалнинг эфир вақти уч ярим ой давом этган, шу вақт мобайнида 2 одам таниганди. Ҳатто қаерда таниб қолишгани ҳам аниқ эсимда. Биттаси таксичилик қилиб юрганимда, биттаси эса «Абу Сахий» бозорига борганимда таниб қолганди. Ундан кейин «Қайнонамдан қарзим бор» сериалида ҳам суратга тушдим. У ҳам катта ўзгариш ясамади. Аммо «Қодирхон» сериалида суратга тушганимдан кейин ўн кун ўтиб, мени танийдиганлар сафи кун сайин ортаётганини ҳис қилдим.

— Аслида қўшиқчи бўламан, деб ният қилгандим. Яхши инсонларнинг кўмагида «Сенсиз» номли клипни ҳам суратга олдим. Аммо хонандаликда омадим кулмади.

Бир куни онам билан қаттиқ тортишиб қолдик. «Пул топмаяпсан, ҳаракат қилмаяпсан», деган гаплардан кейин жаҳл қилиб, оқшом пайтим Қўқонга кетгандим. Чунки у ерда бобомнинг уйи бор эди. Эртаси куни таниш-билишларга қўнғироқ қилиб, мактабдан иш топдим. Ойлигим 750 минг сўм эди. Аммо у ерда мени ушлаб турадиган ягона нарса бу эмасди. Мактаб ҳовлисига киришиб билан болалар қучоқ очиб кутиб олишарди.

Бир куни дадам қўнғироқ қилиб, янги сериал учун кастинг бўлаётганини айтиб қолди. У инсон «Қодирхон» сериалининг продюсери Мусахон Нурматов билан бирга ишлайди, унинг 20 йиллик овоз режиссёри ҳисобланади. Хуллас, таваккал деб Тошкентга келдим ва кастинг топширдим. Ўшанда қизи хиёнат қилган йигит ролини ижро этгандим. Режиссёр Муслим Али иккита рол борлигини айтди. Аслида Даврон сериалнинг биринчи мавсумида ўлиши керак эди. Режиссёр билан маслаҳатлашиб, сценарийга ўзгартириш киритганмиз. Аввалига жуда қийналганман. Бахтимга биринчи мавсумнинг суратга олиш жараёнлари карантин вақтига тўғри келиб қолган. Бир дачага бориб, 10-15 кун съёмка қилардик. Устоз санъаткор Мирза Азизов ва Гулчеҳра Носирова билан бир оила бўлиб яшаганимиз ҳам менинг бахтим бўлган. Устозим Мирза «Аввал кўз гапирсин, ундан кейин хатти-ҳаракат деб уқтирарди», — дейди Даврон Асқаров.

Даврон Асқаров устози Мирза Азизовнинг кутилмаган ўлими якунланмаган сериал ижодкорларига қандай таъсир этгани ҳақида кўзига ёш олиб сўзлаб берди.

— Устознинг ўлимидан аввал олинган съёмкалар бир ҳафтадан кейин эфирга кетадиган вазиятга келиб қолгандик. Ҳар куни янги қисм намойиш этилгани учун бугун қилинган съёмка бир ҳафтадан кейин эфирга узатиларди. Охирги съёмкамиз жуда оғир кетган. Сериалдаги синглим қочиб кетганлигидан отам дарғазаб бўлиши, мени уриши керак эди. Устозим шунчалар қаттиқ урдиларки, костюмим чоклари йиртилаётгани ўзимга эшитилди. Сочимдан тортиб, деворга урди, тарсакининг зарбидан юзим қизариб кетди. Нима қилишимни билмай қолгандим. Бағримга босай десам, қаҳрамоним отасидан нафратланади. Суратга олиш ишлари тугагач, устоз қаттиқ йўталдилар. Билсак, ўша пайтда ковид ва пандемияни бошдан ўтказган экан. Аммо кучли инсон эканлигидан буни ҳеч кимга билдирмай юраверган эканлар.

Овозлаштириш жараёнига борганда дадамдан «Ўғлингизни қаттиқ уриб юбордим», деб узр сўраган эканлар. У кишининг ўлими жамоамиз учун кутилмаган зарба бўлди. Чунки у киши сериалнинг устунларидан бири эди. У қулагач, сериални давом эттиролмаймиз деб ўйлаган эдик. Хуллас, аввалига роса иккиланишлар бўлди. Барибир давом эттириш керак, деб ўзимизни қўлга олдик. Аммо у инсонсиз ишлаш осон кечмади. Аввалгидек маслаҳатчимиз йўқ эди. Шу боисданми 3-мавсумда савиядаги жиддий ўзгариш ўзимизга ҳам сезилди. Аммо ҳалигача сериалда устознинг вафоти ҳақида айтилмаган. Наманганлик бир шогирдлари бор, овозлари жуда ўхшаш. Ўша инсоннинг ёрдами билан устознинг персонажи ҳалигача яшаяпти. У қаҳрамонни хорижга кетган деб келяпмиз, — дейди актёр Даврон Асқаров.

Актёр билан тўлиқ интервьюни қуйида томоша қилишингиз мумкин.

Мавзуга доир:

• «Қодирхон» сериали актёри Даврон Асқаров санъаткорнинг қизига уйланаётгани, бўлажак рафиқаси ҳамда партнёрлари билан миш-мишлар ҳақида (видео)
• «‘Миллионъдаги арабча рақсим сабаб дадам гаплашмай қўйдилар». Актриса Нарминжан отасини хафа қилиб қўйгани ҳақида гапириб берди (видео)
• Суратга олиш майдончасида танишиб, бир-бирига кўнгил қўйган ўзбек шоу-бизнеси вакиллари (видео)