“Qodirxon” serialidagi roli bilan tomoshabinlarga yaxshi tanish bo‘lgan aktyor Davron Asqarov “Daryo” internet nashrining YouTube kanaliga bergan intervyusida aslida maktabda musiqa o‘qituvchilik qilgani, otasi sabab kastingda ishtirok etgani va ustozi Mirza Azizov haqidagi xotiralarini so‘zlab berdi.
— Aslida aktyor emasman. Musiqa sohasida tahsil olib, Qo‘qondagi 31-maktabda 7-sinfgacha musiqa o‘qituvchisi bo‘lib ishlaganman. Yaratgan sababchi bo‘lib, aktyorlik sohasiga kirib keldim. Ilk rolimni “Advokatlar” nomli serialda ijro etganman. 70 qismdan iborat serial menga omad olib kelmadi. Serialning efir vaqti uch yarim oy davom etgan, shu vaqt mobaynida 2 odam tanigandi. Hatto qayerda tanib qolishgani ham aniq esimda. Bittasi taksichilik qilib yurganimda, bittasi esa “Abu Saxiy” bozoriga borganimda tanib qolgandi. Undan keyin “Qaynonamdan qarzim bor” serialida ham suratga tushdim. U ham katta o‘zgarish yasamadi. Ammo “Qodirxon” serialida suratga tushganimdan keyin o‘n kun o‘tib, meni taniydiganlar safi kun sayin ortayotganini his qildim.
— Aslida qo‘shiqchi bo‘laman, deb niyat qilgandim. Yaxshi insonlarning ko‘magida “Sensiz” nomli klipni ham suratga oldim. Ammo xonandalikda omadim kulmadi.
Bir kuni onam bilan qattiq tortishib qoldik. “Pul topmayapsan, harakat qilmayapsan”, degan gaplardan keyin jahl qilib, oqshom paytim Qo‘qonga ketgandim. Chunki u yerda bobomning uyi bor edi. Ertasi kuni tanish-bilishlarga qo‘ng‘iroq qilib, maktabdan ish topdim. Oyligim 750 ming so‘m edi. Ammo u yerda meni ushlab turadigan yagona narsa bu emasdi. Maktab hovlisiga kirishib bilan bolalar quchoq ochib kutib olishardi.
Bir kuni dadam qo‘ng‘iroq qilib, yangi serial uchun kasting bo‘layotganini aytib qoldi. U inson “Qodirxon” serialining prodyuseri Musaxon Nurmatov bilan birga ishlaydi, uning 20 yillik ovoz rejissori hisoblanadi. Xullas, tavakkal deb Toshkentga keldim va kasting topshirdim. O‘shanda qizi xiyonat qilgan yigit rolini ijro etgandim. Rejissor Muslim Ali ikkita rol borligini aytdi. Aslida Davron serialning birinchi mavsumida o‘lishi kerak edi. Rejissor bilan maslahatlashib, ssenariyga o‘zgartirish kiritganmiz. Avvaliga juda qiynalganman. Baxtimga birinchi mavsumning suratga olish jarayonlari karantin vaqtiga to‘g‘ri kelib qolgan. Bir dachaga borib, 10-15 kun syomka qilardik. Ustoz san’atkor Mirza Azizov va Gulchehra Nosirova bilan bir oila bo‘lib yashaganimiz ham mening baxtim bo‘lgan. Ustozim Mirza “Avval ko‘z gapirsin, undan keyin xatti-harakat deb uqtirardi”, — deydi Davron Asqarov.
Davron Asqarov ustozi Mirza Azizovning kutilmagan o‘limi yakunlanmagan serial ijodkorlariga qanday ta’sir etgani haqida ko‘ziga yosh olib so‘zlab berdi.
— Ustozning o‘limidan avval olingan syomkalar bir haftadan keyin efirga ketadigan vaziyatga kelib qolgandik. Har kuni yangi qism namoyish etilgani uchun bugun qilingan syomka bir haftadan keyin efirga uzatilardi. Oxirgi syomkamiz juda og‘ir ketgan. Serialdagi singlim qochib ketganligidan otam darg‘azab bo‘lishi, meni urishi kerak edi. Ustozim shunchalar qattiq urdilarki, kostyumim choklari yirtilayotgani o‘zimga eshitildi. Sochimdan tortib, devorga urdi, tarsakining zarbidan yuzim qizarib ketdi. Nima qilishimni bilmay qolgandim. Bag‘rimga bosay desam, qahramonim otasidan nafratlanadi. Suratga olish ishlari tugagach, ustoz qattiq yo‘taldilar. Bilsak, o‘sha paytda kovid va pandemiyani boshdan o‘tkazgan ekan. Ammo kuchli inson ekanligidan buni hech kimga bildirmay yuravergan ekanlar.
Ovozlashtirish jarayoniga borganda dadamdan “O‘g‘lingizni qattiq urib yubordim”, deb uzr so‘ragan ekanlar. U kishining o‘limi jamoamiz uchun kutilmagan zarba bo‘ldi. Chunki u kishi serialning ustunlaridan biri edi. U qulagach, serialni davom ettirolmaymiz deb o‘ylagan edik. Xullas, avvaliga rosa ikkilanishlar bo‘ldi. Baribir davom ettirish kerak, deb o‘zimizni qo‘lga oldik. Ammo u insonsiz ishlash oson kechmadi. Avvalgidek maslahatchimiz yo‘q edi. Shu boisdanmi 3-mavsumda saviyadagi jiddiy o‘zgarish o‘zimizga ham sezildi. Ammo haligacha serialda ustozning vafoti haqida aytilmagan. Namanganlik bir shogirdlari bor, ovozlari juda o‘xshash. O‘sha insonning yordami bilan ustozning personaji haligacha yashayapti. U qahramonni xorijga ketgan deb kelyapmiz, — deydi aktyor Davron Asqarov.
Aktyor bilan to‘liq intervyuni quyida tomosha qilishingiz mumkin.
Mavzuga doir:
- “Qodirxon” seriali aktyori Davron Asqarov san’atkorning qiziga uylanayotgani, bo‘lajak rafiqasi hamda partnyorlari bilan mish-mishlar haqida (video)
- “‘Million’dagi arabcha raqsim sabab dadam gaplashmay qo‘ydilar”. Aktrisa Narminjan otasini xafa qilib qo‘ygani haqida gapirib berdi (video)
- Suratga olish maydonchasida tanishib, bir-biriga ko‘ngil qo‘ygan o‘zbek shou-biznesi vakillari (video)
Izoh (0)