Ҳужумчи Килиан Мбаппе ва «ПСЖ» ўртасидаги шартноманинг айрим тафсилотлари маълум бўлди.
L’Equipe нашрининг хабарига кўра, ҳужумчи клуб билан аввал хабар берилганидек 2025 йилгача эмас, бир йилга узайтириш ҳуқуқи билан 2024 йилга қадар мўлжалланган шартнома имзолаган.
Бандни фаоллаштириш қарори Килианни ўзига боғлиқ. «Сўнгги йил борасида Мбаппенинг ўзи қарор қилади», — дея тасдиқлади «ПСЖ»даги манба.
Шу тариқа 2023 йилда парижликлар ҳужумчининг келажаги борасида бир қарорга келиши керак бўлади. «ПСЖ» ё Килианни шартномани узайтиришга кўндириши, ёки уни 2024 йилда текинга қўйиб юбормаслик учун сотиб юбориши лозим бўлади.
Эслатиб ўтамиз, Мбаппе ёзда «Реал»га эркин агент сифатида ўтишга яқин эди, бироқ у парижликлар билан янги шартнома имзолашни маъқул кўрди.
23 ёшли футболчи жорий мавсум «ПСЖ» сафида барча мусобақаларда 7 ўйинда иштирок этиб, 9 та голга муаллифлик қилди.
Изоҳ (0)