“Belgilangan miqdordan ko‘p gaz quygan shoxobcha litsenziyasini bekor qilish kerak”. Senator Vazirlar Mahkamasiga taklif berdi (video)

Senator Qutbiddin Burxonov Vazirlar Mahkamasiga taklif berib, metan gazda yuruvchi avtomobillarning portlashiga sabab bo‘luvchi asosiy omil — gaz quyish shoxobchalarida belgilangan maqdordan ko‘p gaz quyish holatiga chek qo‘yish lozimligini gapirdi. Bu haqda Oliy Majlis Senatining ayni paytda bo‘lib o‘tayotgan o‘ttiz ikkinchi yalpi majlisida so‘z bordi.

Senati raisi Tanzila Norboyeva taklifiga ko‘ra so‘z olgan senator, Senatning Mudofaa va xavfsizlik masalalari qo‘mitasi raisi Qutbiddin Burxonov metan gazda yuruvchi avtomobillarning portlashi bilan bog‘liq muammo bugungi kunning asosiy masalalaridan biri ekanini ta’kidladi.

Senatning oldingi yalpi majlislarida bugungi kunda aholini qiynab kelayotgan eng muammoli masalalardan biri avtomobillarga o‘rnatilgan gaz ballonlari bilan bog‘liq muammo muhokama qilinib, Vazirlar Mahkamasiga parlament so‘rovi sifatida yuborilgan edi.

Iyun oyida Vazirlar Mahkamasidan kelgan javobga ko‘ra, Senat qarorida ko‘rsatilgan 1300 dan ortiq kamchilikning 815 tasi bartaraf etilgani, joylardagi 70 ta gaz quyish shoxobchalari faoliyati to‘xtatilgani va kerakli ishlar bajarilayotgani ma’lum bo‘lgan.

Shunga qaramasdan, yaqinda Sirdaryo viloyatida, Xorazm viloyatidagi MCHJga qarashli odam tashuvchi avtobus portladi va 6 nafar fuqaro voqea joyida vafot etdi. 9 nafar fuqaro esa og‘ir tan jarohati olib, shifoxonaga yotqizildi.

Biz Senat qarorida Vazirlar Mahkamasining qarori amalda bajarilmayotganini, yuk avtomobillar, jumladan, odam tashuvchi avtobuslarga o‘rnatilgan gaz ballonlarini texnik ko‘rikdan o‘tkazish uchun laboratoriyalar xarid qilinishi kerakligini bildirgandik”, — deydi senator.

Senatorning tushuntirishicha, ayni kunga qadar avtomobillarga o‘rnatilgan gaz ballonlarini texnik ko‘rikdan o‘tkazishda ko‘z bilan nazorat qilish bilan cheklanmoqda.

Qilinayotgan ishlarga qo‘shimcha qilib shuni aytish kerakki, avtomobillarning gaz ballonlarini texnik ko‘rikdan o‘tkazish uchun laboratoriya jihozlari xarid qilish va birinchi o‘rinda avtobuslar, mikroavtobuslarni texnik ko‘rikdan o‘tkazish hamda gaz ballon o‘rnatilganiga besh yildan ko‘p bo‘lgan bo‘lsa, shu ballondan foydalanib turishni vaqtincha to‘xtatish kerak”, — dedi senator.

Senatorning qo‘shimcha qilishicha, avtomobillardagi gaz ballonlarining portlashiga asosiy sabablardan biri bu — gaz quyish shoxobchalarida belgilangan miqdordan ko‘p gaz quyish holati hisoblanadi.

Yaqinda Qashqadaryoda Nexia, Jizzaxda ‘Jiguli’ avtomobilidagi gaz ballonlari portladi. Bu holat o‘rganilganida portlashga gaz quyish shoxobchasida belgilangan miqdordan ko‘p gaz quyilgani sabab bo‘lgani oydinlashdi.

Shu bois gaz to‘ldirish shoxobchalarida belgilangan miqdordan ko‘p gaz quyish holati ro‘y berganda ularning litsenziyasini ma’lum muddatga, deylik olti oy, bir yil muddatga to‘xtatib qo‘yish kerak degan taklifni berardik.

Vazirlar Mahkamasi shuni o‘rganib, bunga chora ko‘rsa yaxshi bo‘lardi”, — dedi senator.

Senat raisi Tanzila Norboyeva Vazirlar Mahkamasi mas’ullariga murojaat qilib, Senatning keyingi majlislariga qadar senator ko‘targan masala yuzasidan o‘rganish olib borib, xulosalar berish haqida topshiriq berdi.