Фарғона вилояти ҳокими Хайрулло Бозоров бошчилигидаги делегация жорий йилнинг 8—9 сентябрь кунлари ўзаро ҳамкорликни ривожлантириш, манфаатли шартномалар имзолаш мақсадида Тожикистоннинг Сўғд вилоятида бўлди. Бу ҳақда «Дарё» мухбири Азизжон Эрматов хабар бермоқда.
Қайд этилишича, ташриф дастури доирасида дастлаб Хайрулло Бозоров ва Сўғд вилояти раиси Ражаббой Аҳмадзоданинг мулоқоти ва ортидан икки вилоят расмийларининг кенгайтирилган форматдаги учрашуви бўлиб ўтган.
Шунингдек, сафар давомида Хўжанд шаҳрида Фарғона ва Сўғд бизнес-форуми ҳамда икки вилоятда ишлаб чиқарилган маҳсулотлар кўргазмаси ташкилланган. Кўргазмада Фарғона вилоятининг 20 дан ортиқ корхоналари қарийб 100 турдаги маҳсулотлари билан иштирок этган.
Икки вилоятнинг 100 дан зиёд тадбиркорлари қатнашган бизнес-форумда ҳудудларнинг инвестиция, экспорт ва туризм салоҳияти тақдимоти ўтказилган.
Тақдимот давомида «Баҳодир Лоғон текстил» кластери томонидан Сўғд вилояти Ашт туманида 20 минг гектар ерни ўзлаштириш, «Исмоилжон гиламлари» корхонаси томонидан Бўстон шаҳрида гилам тўқиш цехини ташкил этиш лойиҳалари амалга оширилаётгани таъкидланди.
Фарғона ва Сўғд тадбиркорлари ўртасида ўтказилган B&B форматидаги учрашувлардан сўнг икки кун давомида эришилган келишувларни имзолаш маросими бўлиб ўтди. Унда савдо-иқтисодий ҳамкорлик юзасидан умумий қиймати 19 миллион доллар бўлган 11 та ҳужжат имзоланди.
Изоҳ (0)