Ижтимоий тармоқларда 12 сентябрдан 13 сентябргача ўтиш кечаси — 00:00 дан бошлаб Тошкент шаҳри ва қўшни вилоятларга кириш-чиқиш йўллари ёпилиши ҳақида видео тарқалмоқда.
Видеода ЙПХ ходимининг айтишича, йўлларимиз ёпилади, Тошкент шаҳрига «стоянка»лар ёпилади.
«Кўчаларга чиқиб бошқаларга оғирлигиз тушиб юрманг. Машинада ухлаб қолиб, нарсаларингизни кўчада ўғирлатиб, бола-чақангизнинг ризқини қирқманг. Ҳам илтимос, ҳам талабим секин ҳаракатларингизни қилинглар», — дейди ички ишлар ходими.
Ҳолат юзасидан Ички ишлар вазирлиги матбуот хизмати раҳбари Шоҳрух Ғиёсовнинг «Дарё»га маълум қилишича, бу хабарлар нотўғри. Унинг айтишича, фуқаролардан ШҲТ саммити ўтказилиши муносабати билан 14—15—16 сентябрь кунларида Самарқанд шаҳрида режалаштирилган саёҳатни бошқа кунга қолдиришлари сўралган. Буни ЙПХ ходимлари нотўғри тушунтирган.
«Ҳурматли фуқаролар!
Эслатиб ўтамиз, Самарқанд шаҳрида Шанхай ҳамкорлик ташкилотига аъзо мамлакатларнинг навбатдаги саммити бўлиб ўтади.
Шу муносабат билан, айни кунларда Самарқанд шаҳрига чет мамлакатлардан расмий меҳмонлар ташриф буюраётгани ҳамда тайёргарлик ишлари олиб борилаётганини инобатга олиб, халқаро тадбир бўлиб ўтиши арафасида имкон қадар, зарурат бўлмаса, 14—15—16 сентябрь кунларида Самарқанд шаҳрига режалаштирилган саёҳатингизни вақтинча бошқа кунларга қолдиришингизни тавсия қиламиз.
Ушбу тадбир жараёнида тез тиббий ёрдам ва фавқулодда ҳолатларда хизмат кўрсатувчи транспорт воситаларининг ҳаракати чекланмайди.
Тарихий аҳамиятга эга, олий даражадаги учрашувни кўтаринки кайфиятда ўтказиш учун, юқорида келтирилган ноқулайликларни тўғри баҳолаб, жамоат тартибини сақлаш, ҳаракат хавфсизлигини таъминлаш мақсадида хизмат олиб бораётган ҳуқуқ-тартибот ходимларининг кўрсатма ва тавсияларини тўғри қабул қилиб, уларга риоя этишингизни сўраймиз», – дейди ички ишлар вазирлиги масъул ходими.
Вазирликнинг қўшимча қилишича, фуқаролардан ШҲТ саммитига доир барча ўзгаришларни давлат идораларининг расмий манбаларидан олишлари сўралади.
Изоҳ (0)