IT Park ойига 1 000 доллар ишлаб топадиган график дизайнер ҳақида ҳикоя қилди. Асадбек Абдураҳмонов 2000 йилда Жиззах шаҳрида туғилган.
Болалигидан график дизайнга қизиққан Асадбек 14 ёшида дастурларни мустақил ўзлаштира бошлади. Айниқса, Adobe After Effects ва Adobe Photoshop дастури унда алоҳида қизиқиш уйғотди.
Асадбек фаолиятидаги илк қадамини орадан бир йил ўтиб, 15 ёшида қўйди. Босмахонада амалиёт ўтаётган кезлари ходимлардан бири унга Adobe Illustrator, Adobe Premiyere, Blender, Adobe Хd каби дастурларни ўргата бошлаган. У ерда Асадбек қўшимча пул ишлаб, билим ва кўникмаларини ошира бошлади.
2019 йилда 19 ёшида у ўз босмахонасини очиб, учта ёш мутахассисни ёллади. Жамоа 3 йил давомида турли буюртма ва лойиҳалар билан ишлади.
Карантин вақтида уларнинг фаолияти бир муддатга тўхтаган бўлса-да, ҳозирда босмахона Жиззах ва пойтахтдаги турли савдо нуқталари ва дўконлари, ўқув марказлари ва бир нечта кафелар билан ҳамкорлик қилмоқда.
Ҳозир йигит 22 ёшда, у Москва давлат бошқаруви институтининг 3-курс талабаси сифатида сиртдан ўқийди. Бундан ташқари, Асадбек Technomart, Indenim каби йирик маҳаллий компаниялар билан ҳамкорлик қилади, шунингдек, Жиззах IT марказидаги график дизайн курси ўқитувчиси.
Ёш муаллим ойига 50 дан ортиқ талабаларга сабоқ беради. Улардан баъзилари аллақачон шаҳарнинг кўплаб таниқли корхона ва фирмаларида ўз мутахассислиги бўйича ишлаб келмоқда.
Бундан ташқари, Асадбек йирик аутсорсинг платформаларидан бирида фрилансер бўлиб ишлайди, у ерда буюртма ва лойиҳаларни қабул қилади.
Асадбекнинг орзуси реклама агентлиги очиш ва у ерга малакали мутахассисларни таклиф этиш.Ўқитувчилик ва мустақил фаолият қаҳрамонимизга катта даромад келтиради. Асадбек ойига 1 000 доллар ёки ундан да кўп маош олади ва бу билан чекланиш нияти йўқ.
Аввалроқ АҚШда яшаб Uber компаниясида ишлаётган ўзбекистонлик IT-мутахассиси ҳикояси берилган эди.
Изоҳ (0)