«Аълочи синфдошим ҳозир қоровул бўлиб ишлаяпти» — Абдуқодир Тошқулов ОТМга аввалги қабул тизими қобилиятларни йўқотишга сабаб бўлгани ҳақида

Олий таълим муассасасига кириш имтиҳонларида абитуриентларга 5 та йўналишни танлови берилиши қобилиятларни асраб қолишда имконият яратади. Бу ҳақда АОКАда бўлиб ўтган матбуот анжуманида олий таълим вазири Абдуқодир Тошқулов айтиб ўтди.

Абдуқодир Тошқуловнинг айтишича, олий таълим муассасасига кириш имтиҳонларида абитуриентларга 5 та йўналишни танлаш имкониятининг берилиши ёшларнинг келажакда ўз йўлини топишларига ёрдам беради. Буни вазир бир вақтлар аълочи бўлган синфдошининг ҳаёти билан қиёслади.

«Менинг бир синфдошимнинг кўпгина фанлардан билими мендан яхшироқ эди. Мен беш дақиқада математикадан масалани ишласам, у уч дақиқада бошқа йўл билан ишлаб қўярди. У Тошкентга келди. Ўша вақтларда иқтисодий йўналишларга кириш 200 баллдан паст эмас эди. Келади, 189 балл олади, қайтади, яна келади, 192 балл олади, қайтади. Мен 177 балл билан ўзимнинг вилоятимда ўқиб, мана, бугун сизга ҳисобот берадиган даражагача президентимиз, халқимиз ишончи билан келдим. У синфдошим беш йил шунақа бўлиб, шу билан ўқимади. Яқинда бориб касбини сўрасам, мактабда қоровул бўлиб ишлаётган экан. Кўзимдан ёш чиқиб кетди. Ўша даврдаги таълим сиёсати шунақа қобилиятни бой берди. Ҳали ҳам ўқисам бўладими, деб сўраяпти, олови ўчмаган. Ҳозир бешта ёналишни белгилаш жуда катта имконият эканлигини бир ўйлаб кўринг. Агар шу имконият бўлганида, ҳозир қоровул бўлиб ишлаётган синфдошим ўқиб кетарди. Давлатга, жамиятга хизмат қиладиган мутахассис бўларди. Қоровуллик касбини ерга урмоқчи эмасман. Ҳар ким қобилиятига, шароитига яраша ишни қилиши керак. Биз қобилиятни йўқотиб қўйдик», — деди олий таълим вазири.

Маълумот учун, 2018 йилгача абитуриентлар фақат битта таълим йўналишини танлаши мумкин эди. 2019 йилда бу кўрсаткич 3 тани, 2020 йилда эса 5 тани ташкил этган.