Фарғонада собиқ ҳамшира уй шароитида укол қилиши оқибатида қизалоқ вафот этди. Бу ҳақда «Севимли» телеканалининг «Замон» информацион дастурида хабар қилинди.
Маълум қилинишича, воқеа Учкўприк туманида содир бўлган. 1988—2000 йилларда туман тиббиёт бирлашмасида ҳамшира бўлиб ишлаган, соғлиғи ёмонлашгач, ишламай қўйган аёл қишлоқдошларининг илтимоси билан уй шароитида шифокор буюрган уколларни қилиб келган.
Овсинининг келини ҳам қизи бетоб эканини айтиб, шифокор ёзиб берган уколларни қилиб беришини илтимос қилган. Аёл унга йўқ деёлмаган ва шифокор тавсия қилган «Сефтокс» номли кукунни 10 грамм «Новокаин» билан эритган ва эритманинг 0,1 граммини қизалоқнинг чап қуймуч қисмига синама тарзда юборган.
Орадан 3-4 дақиқа ўтгач, қиз қорни оғриётганини айтиб, қайт қилиб юборган ва сал ўтмай ҳушини йўқотган. Қиз Бувайда туман Тез тиббий ёрдам бўлими 9-сонли шохобчасига олиб борилаётган вақтда вафот этган.
Суд тиббий экспертизасининг хулосасига кўра, қизалоққа «Сефтокс-Новокаин» эритмаси юборилганда ножўя тасир қилиши оқибатида аллергик реакцияни юзага келтирган ва нафас йўллари беркилиб қолган. Уй шароитида мазкур ҳолатнинг олдини олишда фойдаланиладиган дори воситалари йўқлиги сабаб ўлим қайд этилган.
Ҳолат юзасидан юритилган иш Жиноят ишлари бўйича Қўқон шаҳар судида кўриб чиқилиб, судланувчига нисбатан Жиноят кодексининг 102-моддаси (эҳтиётсизлик орқасидан одам ўлдириш) 1-қисми билан малакаланиб, унинг аёл киши экани, муқаддам судланмагани, жабрланувчи қонуний вакилининг унга нисбатан даъвоси йўқлиги енгиллаштирувчи ҳолат сифатида инобатга олиниб, 2 йил муддатга озодликни чеклаш жазоси тайинланган.
Изоҳ (0)