Украина урушдан етган зарар учун Россиядан 300 млрд доллар товон пули ундирмоқчи

Украина ҳукумати Россиядан ўз ҳудудига бостириб кирилиши оқибатида етказилган барча зарарлар қопланишига эришмоқчи, деб ёзади Meduza Украина адлия вазири Денис Малюськага таяниб.

Унинг сўзларига кўра, БМТ Бош ассамблеясида Киев тегишли резолюция қабул қилинишига эришишни режалаштирмоқда, зарарни қоплаш бўйича халқаро механизм келажакда айнан шу ҳужжатга асосланади.

«Россия ўзининг тажовузкор уруши билан Украинага етказган барча зарарлар учун компенсация олишни истаймиз», — деди Малюська. Унинг сўзларига кўра, ҳозир мамлакатда инфратузилма, уйлар ва саноат объектларивайрон бўлиши оқибатидаги зарар 300 миллиард доллардан ошади.

Мамлакат аҳолисига етказилган зарарни ҳозир ҳисоблаб бўлмайди, деди вазир. Унинг қўшимча қилишича, уруш чоғида ҳалок бўлганларнинг қариндошлари ҳам компенсация учун ҳуқуққа эга.

Украина «Катта еттилик» мамлакатларида музлатиб қўйилган Россия банки активларидан фойдаланиш ҳуқуқини қўлга киритмоқчи, дея аниқлик киритди Малюська. Уларнинг қиймати айтиб ўтилган компенсация суммасига тенг келади. Бундан ташқари, Киев Россия давлат корхоналарининг чет элдаги активлари ва россиялик олигархларнинг мусодара этилган мулкларидан фойдаланиш ҳуқуқини ҳам талаб қилади.

Украина аввал ҳам Россиядан ўз ҳудудига бостириб кирганлик учун компенсация талаб қилган эди. Июнда Украина Адлия вазирлиги инсон ҳуқуқлари бўйича Европа судига даъво киритиб, Россия қўшинларининг тўлиқ олиб кетилишини ва Россия тажовузи оқибатида жабрланганларга пул кўринишидаги компенсация тақдим этилишини талаб қилган эди. Ҳужумнинг биринчи босқичида урушдан етган зарар 80 миллиард долларга баҳоланган эди.

Июнь бошида Украина бош вазири Денис Шмигаль урушдан кейин мамлакатни қайта тиклаш учун 750 миллиард доллар талаб этилишини айтган. Шунингдек, у реконструкцияни молиялаштиришнинг бош манбаи Россия ва россиялик бизнесменларнинг чет элдаги мусодара қилинган активлари бўлиши кераклигини қайд этганди.

БМТ Бош ассамблеяси 77-сессияси Нью-Йоркда 13 сентябрда очилади. Умумий музокаралар 20—26 сентябрда бўлиб ўтади.