Ўзбекистон журналистика ва оммавий коммуникациялар университетида ректорга салом бермаган талаба калтаклангани ҳақида хабарлар тарқалганди. Университет Одоб-ахлоқ комиссияси ҳолат юзасидан баёнот берди.
Маълум қилинишича, 10 сентябрь куни университет Одоб-ахлоқ комиссиясининг кенгайтирилган таркибдаги йиғилиши бўлиб ўтди. Мазкур йиғилишда 9 сентябрь куни университет талабаси Ж.Маҳмудов ҳамда университет ходимлари У.Рустамов, Х.Мирзаев, Ф.Очилов ўртасида бўлиб ўтган келишмовчилик ҳолати кўриб чиқилди.
Ўрганишга кўра, университет ходими Х.Мирзаев талаба билан ўзаро қўпол муомала сабабли шахсий тортишувга боргани маълум бўлди. Вазият университет профилактика нозири Ҳ.Содиқов томонидан ўрганиб чиқилган ва шу куннинг ўзида томонлар ярашуви қарори қабул қилиниб, масалага ечим берилгани аниқланди. Бироқ, ярашув қарори қабул қилинганига қарамай, университет ички меҳнат тартиб-қоидалари бузилгани юзасидан чора кўрилиши лозим деб топилди.
Меҳнат кодексининг 181-моддасида назарда тутилган интизомий жазо чораси, яъни ўз ваколати доирасидан ташқарига чиққани сабабли Х.Мирзаев эгаллаб турган лавозимидан озод этилди ва у билан тузилган меҳнат шартномаси бекор қилинди.
Бошқа ходимлар — У.Рустамов ва Ф.Очиловга нисбатан ҳайфсан интизомий чорасини қўллаш юзасидан қарор қабул қилинди. Шунингдек, университет раҳбариятига ўз вақтида хабар бермагани сабабали профилактика нозири — капитан Ҳ.Содиқовга нисбатан тегишли чора кўрилиши учун туман ички ишлар органига тавсия юборилди.
Изоҳ (0)