Farg‘ona viloyati Yozyovon va Buxoro viloyati Qorako‘l tumanlarida kredit mablag‘larini talon-toroj qilgan shaxslar aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Yozyovon tuman bo‘limi tomonidan tergovga qadar tekshiruv o‘tkazilgan. Unda, Q.S. MCHJ rahbari A.X. hududiy tijorat banki filiali mas’ullari bilan o‘zaro til biriktirib, 55 nafar fuqaroga 10 sotixdan yer maydoni ajratib, ularning nomlariga ekin urug‘i sotib olish uchun 165 mln so‘m imtiyozli kredit ajratilishiga erishgani aniqlangan. U ushbu mablag‘larni MCHJga o‘tkazish orqali talon-toroj qilgan.
Shuningdek, Qorako‘l tuman bo‘limi tomonidan o‘tkazilgan tergovga qadar tekshiruvda muqaddam firibgarlik jinoyati uchun sudlangan I.O. fuqaro B.ning imzosini soxtalashtirgani ma’lum bo‘lgan. U fuqaro B. nomidan tijorat banki filialidan 92,5 million so‘m kredit ajratilishiga erishib, ushbu kredit mablag‘i evaziga ta’minotchi korxona tomonidan berilgan mayda shoxli mollarni firibgarlik yo‘li bilan qo‘lga kiritgan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)