Самарқанд вилоятида алимент тўлашдан қасддан бўйин товлаб келган 77 нафар қарздор ота жиноий, 521 нафари эса маъмурий жавобгарликка тортилди. Бу ҳақда Халқ депутатлари вилоят кенгашининг навбатдаги сессиясида МИБнинг вилоят бошқармаси бошлиғи Меҳрож Насруллаев хабар берди.
Сессияда таъкидланишича, 2022 йилнинг олти ойи давомида мажбурий ижро тадбирлари натижасида Самарқанд вилоятида алимент тўловчи қарздорлардан жами 59,5 миллиард сўмдан ортиқ алимент пуллари ундирилган.
«2022 йилнинг 1 июль ҳолатига кўра вилоят бўйича алимент тўловларини ундириш билан боғлиқ ижро ҳужжатлари 34 минг 508 тага етган. Бу МИБ вилоят бошқармаси иш юритувидаги ижро ишларининг 28,3 фоизини, яъни қарийб учдан бир қисмини ташкил қилади. 2022 йилнинг олти ойида 2021 йилнинг мос даврига нисбатан қарздорлардан 32,4 миллиард сўм кўп алимент пуллари ундирилган. Алимент тўловларини тўлашдан мунтазам равишда бўйин товлаб келган жами 521 нафар қарздор Маъмурий жавобгарлик тўғрисидаги кодексининг 474-моддаси билан маъмурий жавобгарликка, 77 нафари эса Жиноят кодексининг 122-моддаси билан жиноий жавобгарликка тортилган», — дейди Меҳрож Насруллаев.
Қайд этилишича, вилоят бўйича алимент олувчилар номига шахсий банк пластик карталари очилиб, 6 ой давомида 45,4 миллиард сўмдан ортиқ алимент пуллари уларнинг пластик карталарига ўтказиб берилган.
Изоҳ (0)