Нукус воқеаларининг асосий айбланувчиларидан бири Даулетмурат Тажимуратовнинг айни кундаги аҳволи ҳақида маълумот берилди.
Таъкидланишича, Омбудсман ва парламент комиссияси аъзолари Қорақалпоғистондаги намойишлар бўйича асосий айбланувчилардан бири бўлган Даулетмурат Тажимуратов билан Урганчдаги тергов ҳибсхонасида учрашган. Унда тергов ҳаракатлари пайтида Тажимуратовга нисбатан қийноқ ва босим ўтказилмаганини маълум бўлган.
Комиссия аъзолари Хоразм вилоятининг Урганч шаҳридаги 11-сон Тергов ҳибсхонасига ташриф буюриб, у ерда сақланаётган шахсларнинг яшаш, овқатланиш, тиббий хизматдан фойдаланиш ҳамда адвокатлар ва яқин қариндошлари билан қисқа муддатли учрашув хоналардаги шароитлар ўрганган.
Шунингдек, Тергов ҳибсхонасида ушлаб турилган шахслар билан суҳбатлашилган. Хусусан, бўлиб ўтган ҳолатлар ва воқеаларда жиноят содир этгани учун ҳибсга олинган Даулетмурат Тажимуратов билан ҳам учрашув бўлиб ўтган.
Учрашув давомида Д.Тажимуратов адвокат билан таъминланганини ва адвокатининг у билан учрашишида ҳеч қандай қаршиликлар йўқлигини, оила аъзолари билан ҳам қисқа муддатли учрашув ўтказилганлигини ҳамда посилка ва йўқловлар олаётганини маълум қилган.
Д.Тажимуратовнинг сўзларига кўра, унга нисбатан тергов ҳаракатлари давомида ва тергов ҳибсхонасида ҳеч қандай қийноқ, босим ёки тазйиқлар бўлмаган. Овқатларнинг сифати ва ҳибсхонадаги бошқа шароитларга ҳеч қандай эътирози йўқлигини билдирган.
Комиссия аъзолари ташриф давомида гумон қилинувчиларнинг Тергов ҳибсхонасида сақланаётган пайтида ва тергов жараёнларида ҳеч қандай ҳуқуқлари бузилмагани ҳамда руҳий ва жисмоний қийноқ ҳолатларига йўл қўйилмаганига гувоҳ бўлган.
Изоҳ (0)