Ижтимоий тармоқларда Қўқон шаҳар Ички ишлар бошқармаси Йўл ҳаракати хавфсизлиги бўлимида бир аёлнинг соғлиғи ёмонлашгани, яна бир фуқаро эса ўзига тан жароҳати етказишга урингани акс этган видео тасвир тарқалди. Вилоят ИИБ матбуот хизмати ҳолатга аниқлик киритди.
Ушбу ҳолат ўрганилганда, 1 сентябрь куни Қўқон шаҳар Усмон Носир кўчасида ЙПХ инспекторлари томонидан тўхтатилган Matiz ҳайдовчиси психотроп модда таъсирида эканликда гумонланиб, тиббий текширувга таклиф этилган вақтда ҳайдовчи тиббий текширувдан бош тортган.
лиги, ушбу ҳолат юзасидан ЙПХ инспекторлари томонидан Маъмурий жавобгарлик тўғрисидаги Кодекснинг 136-моддаси (транспорт воситалари ҳайдовчиларининг ва йўл ҳаракати бошқа иштирокчиларининг мастлиги ёки маст эмаслигини аниқлаш учун текширувдан ўтишдан бўйин товлаши)га асосан маъмурий баённома расмийлаштирилган.
5 сентябрь куни ушбу машина ҳайдовчиси ва унинг онаси Қўқон шаҳар Ички ишлар бошқармаси ЙҲХБга келиб, ушбу маъмурий баённомага эътироз билдирган ва Matiz’ни жарима майдонидан чиқариб беришни сўраган.
Ички ишлар органлари ходимлари юқоридаги ҳолат юзасидан тўпланган ҳужжатлар суд органига кўриб чиқиш учун юборилиши ҳамда қонуний қарор қабул қилинишини тушунтирганда ҳайдовчининг бундан жаҳли чиқиб, ўзига тан жароҳати етказган ва онасининг соғлиги ёмонлашган.
Қайд этилишича, ушбу фуқароларга зудлик билан тиббий ёрдам кўрсатилган. Ҳозирда ҳолат юзасидан ўрганиш ишлари олиб борилмоқда.
Изоҳ (0)