Январь ойи охиридан бери камида саккиз нафар таниқли россиялик ишбилармонлар ўз жонига қасд қилиш ёки ҳали тушунтирилмаган бахтсиз ҳодисаларда ҳалок бўлган, улардан олтитаси Россиянинг иккита йирик энергетика компанияси билан алоқадор. Бу ҳақда CNN хабар бермоқда.
Уларнинг олтитасидан тўрттаси Россия давлат энергетика гиганти «Газпром» ёки унинг шўъба корхоналаридан бирига, қолган иккитаси эса Россиянинг энг йирик хусусий нефть ва газ компанияси «Лукойл» билан боғлиқ эди.
Йил бошида «Лукойл» компания ноодатий жамоатчилик позициясини эгаллаб, Россиянинг Украинадаги урушига қарши чиқди, қурбонларга ҳамдард бўлишга ва можарога барҳам беришга чақирди.
Компания раиси Равил Маганов шу ҳафта Москвадаги шифохона деразасидан йиқилиб вафот этди, — деб хабар бермоқда Россия давлат ахборот агентлиги «ТАСС».
1 сентябрда Маганов оғир касалликдан сўнг вафот этди, деб баёнот берди «Лукойл». Унда йиқилиш ҳақида ҳеч нарса айтилмаган.
«Лукойл»нинг яна бир топ-менежери Александр Субботин май ойида Москва яқинида шаманга ташриф буюрганидан сўнг ўлик ҳолда топилган эди, — деб хабар бермоқда «ТАСС».
Хабар берилишича, тез ёрдам юрак етишмовчилигидан азият чеккан ҳушсиз одамга чақирилган. Полиция ушбу ҳолат юзасидан жиноий иш қўзғатган.
«Газпром» билан алоқалар
Бу йилги ўлим ҳолатларининг биринчиси — «Газпром»нинг юқори лавозимли раҳбари 2022 йил 30 январь куни Ленинград яқинидаги коттежда ўлик ҳолда топилгани бўлди.
Воқеа жойида ўз жонига қасд қилиш тўғрисидаги ёзув топилгани ва терговчилар ўлимни ўз жонига қасд қилиш сифатида текшираётгани ҳақида хабар берилган.
Россия миллий телерадиокомпанияси бу шахсни «Газпром Инвест» компаниясининг транспорт бўлими бошлиғи Леонид Шулман эканлигини маълум қилган.
Орадан бир ой ўтгач 25 февраль куни, худди шу қишлоқда «Газпром»нинг яна бир топ-менежери Александр Тюлаков ўлик ҳолда топилди. Хабар берилишича, у ўз жонига қасд қилган.
Апрель ойида «Газпром»га алоқадор яна икки россиялик тадбиркор қотиллик ва ўз жонига қасд қилиш оқибатида ҳалок бўлган.
Улардан бири, «Газпромбанк»нинг собиқ вице-президенти Владислав Аваев 18 апрель куни Москвадаги квартирасида рафиқаси ва қизи билан ўлик ҳолда топилган.
Қариндошларидан бири Аваевларнинг жасадларини оила ҳайдовчиси ва энагаси улар билан телефон орқали боғлана олмаётганини, квартирага ҳам киролмаётганини айтганидан кейин топган — эшик ичкаридан ёпиқ бўлган.
Яқинда Россиядан Украинага кетган «Газпромбанк»нинг собиқ вице-президенти Игорь Волобуэв интервьюсида Аваев ўзини ўлдирганига ишонмаслигини билдирган.
Бир кун ўтиб, 19 апрель куни қисман «Газпром»га тегишли бўлган «Новатек» газ ишлаб чиқарувчи компаниясининг собиқ раҳбари Сергей Протосеня Барселона яқинидаги Ўрта ер денгизи курорти Ллорет де Мардаги уйида ўлик ҳолда топилган.
Унинг хотини ва қизининг зўравонлик аломатлари мавжуд жасадлари оиланинг ҳашаматли уйи ичидан топилган, Протосенянинг жасади эса ташқаридаги боғда бўлган.
Ллорет де Мар шаҳри жойлашган Жирона провинциясидаги Каталония полицияси хабар беришича, улар иш бўйича терговни якунлаб, хулосаларни судга юборган.
Полиция ўлимлар қўш қотиллик ва ўз жонига қасд қилиш деган хулосага келганини айтди.
Апрель ойида Daily Mail билан суҳбатда Протосенянинг ўғли воқеаларнинг ушбу версиясини шубҳаланаётганини ва отаси ўлдирилганини тахмин қилаётганини билдирди.
Асли украиналик Россия фуқароси нефть ва газ миллиардери Михаил Уотфорд 28 февраль куни Англиянинг Суррей шаҳридаги уйида ўлик ҳолда топилган.
Март ойи охирида Нижний Новгородда яна бир россиялик тадбиркор Василий Мелников оиласи билан бирга ўлик ҳолда топилган.
Мелниковга тиббиёт буюмлари ишлаб чиқарувчи МеdStom компанияси тегишли эди. Россия Тергов қўмитаси маълумотларига кўра, 23 март куни 43 ёшли эркак, унинг 41 ёшли рафиқаси ва 4-10 ёшли икки фарзанди пичоқлаб ўлдирилгани аниқланган.
Изоҳ (0)