Ҳиндистондаги машҳур тадбиркор оилалардан бирининг меросхўри ва миллиардер Сайрус Мистри автоҳалокатда вафот этди, деб ёзади NDTV.
Ҳодиса 54 ёшли Сайрус Мистри ва унинг ҳамроҳлари Mercedes автомобилида Аҳмадободдан Мумбайга кетаётганида юз берган.
Дастлабки маълумотларга кўра, ЙТҲга ҳайдовчининг бошқа транспорт воситасини қувиб ўтиш мақсадида тезликни оширгани сабаб бўлган — у бошқарувни йўқотиб, кўприкдан ўтаётганда панжарага урилган.
Машинада тўрт киши бўлган, улардан фақат икки нафари омон қолган ва шифохонага етказилган. Қолган икки нафари, жумладан Сайрус Мистри воқеа жойида ҳалок бўлган. Полиция ҳодиса юзасидан батафсил текширув олиб бормоқда.
Ҳиндистон бош вазири Нарендра Моди Мистри вафоти муносабати билан ҳамдардлик билдириб, уни Ҳиндистоннинг иқтисодий кучига ишонган истиқболли бизнес раҳбар эди, деб атади.
«Унинг вафоти савдо ва саноат учун катта йўқотиш бўлди», — деб ёзди бош вазир Twitter’да.
2012 йилдан 2016 йилгача Мистри Ҳиндистондаги энг йирик компаниялардан бири бўлган Тата Group кўп миллатли конгломерат компаниясининг раиси бўлган. Bloomberg Billionaires Index маълумотларига кўра, Мистри ўлими вақтида қарийб 29 миллиард долларга эга эди, бу уни Ҳиндистондаги энг бой одамлардан бирига айлантирганди.
Изоҳ (0)