Кремль биринчи марта Путинни ва Украинадаги урушни танқид қилувчи санъаткорларга муносабат билдирди

Кремлдагилар биринчи марта Путинни ва Украинадаги урушни танқид қилувчи санъаткорларга муносабат билдирди.

Баъзи россиялик артистлар «номақбул баёнотлари билан ўз номига доғ туширди», деди Россия президенти матбуот котиби Дмитрий Песков журналистларга.

«Шундай санъаткорлар борки, улар мутлақо номуносиб ва номақбул баёнотлари билан том маънода ўзларига доғ туширди. Бу алоҳида ҳикоя, ва улар билан йўлларимиз бошқа-бошқа эканлиги аниқ-равшан», — деди Кремль вакили.

Песков уруш бошланганидан кейин кетган артистларнинг мамлакатга қайтишини изоҳлаётиб шундай фикрларни айтиб ўтди. Улар орасида Алла Пугачёва ҳам бўлиб, у баҳорда турмуш ўртоғи Максим Галкин ва фарзандлари билан мамлакатни тарк этганди. Август охирида у Россияга қайтиб келди.

Песков қайд этишича, Пугачёвадан ҳеч қандай номақбул баёнотларни эшитмаган, аммо Галкин, матбуот котибининг фикрича, «жуда ёмон гапларни гапирган». «У билан йўлларимиз бошқа-бошқа, бу аниқ», — дея қўшиб қўйди Песков. Владимир Путиннинг вакили таъкидлашича, Галкиннинг гапларига ҳозирча «ваколатли органлар» баҳо бергани йўқ, бироқ «унинг гаплари унинг ўзини бизга қарши қилиб қўяди».

Айни вақтда Пугачёвага президент «жуда яхши» муносабатда. «Улар бир-бирини билади, улар таниш, бир неча марта учрашишган», — деди Песков.

Песковнинг баёноти Пугачёванинг урушга қарши постидан кейин бир неча соат ўтиб янгради ва у ушбу постга жавоб деб ҳисобланиши мумкин.

Россия Украинага бостириб киргач, бир қатор санъаткорлар урушга қарши чиқди, уларнинг айримлари Россияни тарк этди. Уруш ва Путинни  танқид қилган артистлар деярли дарҳол концертлари бекор қилиниши ҳолатига дуч келди. Уларнинг бир қатори эса «хорижий агентлар» рўйхатига киритилди.

Концертлари ноошкорона тақиқланган бўлишига қарамасдан, Кремль шу пайтгача ҳукуматни танқид қилувчи қўшиқчиларга нисбатан ўз муносабатини билдирмаганди. Март охирида Песков баъзи артистларнинг мамлакатдан кетишини ошиқча бўрттирмасликка чақирган эди, холос. Шунингдек, Кремль ҳарбийлар учун, шу жумладан, касалхоналарда концерт бераётган санъаткорларни қўллаб-қувватлаган эди.