Тошкент халқаро аэропортида буқаламунлар олиб кираётган фуқаро қўлга тушди. Бу ҳақда Давлат божхона қўмитаси хабар қилди.
Қайд этилишича, 31 август куни Мисрдан Тошкентга учиб келган фуқаро Й.Ж. халқаро аэропортда яшил йўлакдан ҳаракатланаётиб, безовталаниши туфайли ўрнатилган тартибда божхона кўригидан ўтказилган. Натижада ушбу шахснинг юклари орасидаги пластик идишда 10 дона буқаламун борлиги аниқланган.
Ушбу буқаламунларнинг умумий қиймати 54,7 миллион сўмни ташкил қилиши маълум бўлган.
Ҳозирда буқаламунлар Тошкент ҳайвонот боғига топширилган. Ташиш ва сақлаш қоидаларига риоя қилинмагани сабабли мутахассислар томонидан улардан 6 тасининг аҳволи оғирлиги маълум қилинган.
Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.
Изоҳ (0)