Ижтимоий тармоқларда Андижон вилояти ҳокими Шуҳрат Абдураҳмонов Қўрғонтепа туманидаги ёғ заводи ишчиси фарзандининг контракт тўловини тўлаб бергани айтилган видео тарқалди.
Таъкидланишича, янги завод ишчиси ишхонаси томонидан яратиб берилган имкониятлар ҳақида гапириб, бунинг учун давлат раҳбари ва вилоят ҳокимига миннатдорлик изҳор қилиб, «Биз президентимизнинг ташаббуси, ислоҳотларини тўғри йўлда олиб бораётган ҳоким жаноблари — Сизга ҳам ўз миннатдорлигимизни билдирмоқчимиз. Ишлаётган қизларимизни, шахсан ўзимнинг икки нафар фарзандим олий ўқув юртига контракт асосида ўқишга кирди. Худо хоҳласа шу ерда ишлаб бўлса ҳам контрактларини тўлаймиз», — деган.
Аёл фикрларини якунлагач, Шуҳрат Абдураҳмонов унга «Иккаласи ҳам контрактми? Контракти неча пул?», деган саволлар билан юзланган. Аёл фарзандлари учун тўлаши лозим бўлган шартнома суммаси 7 миллион эканини айтгач, ҳоким шартнома пулларини ўз ҳисобидан тўлаб беришини билдирган.
«Дарё» манбаларининг қўшимча қилишича, тадбирда иштирок этган бир нечта тадбиркор ушбу аёлга шартнома пулларини бермоқчилигини айтган. Бироқ, Шуҳрат Абдураҳмонов савоб қилиш умидида эканлигини билдириб, ушбу савобли ишга ҳеч кимни шерик қилишни истамаган. Шу сабабли ўша ернинг ўзида чўнтагидан нақд пул берган.
Изоҳ (0)