Тошкентда машиналарнинг эшигига кодли қулф осиб, уни очиш учун ҳайдовчилардан пул талаб қилган йигит ушланди.
Пойтахт ИИББ матбуот хизматининг хабар беришича, олиб борилган тезкор тадбирлар давомида ушбу ҳаракатларни содир этганликда гумондор 29 ёшли М.А. ушланган. Холислар иштирокида унинг ёнидан 2 дона кодли қулфлар топилиб, ашёвий далил сифатида олинган.
Суҳбат давомида у интернетда шундай пул ишлаш усулини кўриб, ундан фойдаланишга қарор қилганни айтган. Режага кўра, у қулфни автомашина эшигининг ушлагичига осиб, ҳайдовчига қулфни очиш учун код рақамини сотиб олиш таклифи ёзилган хат қолдирган. Кўрсатилган ҳисоб рақамига пул маблағлари келиб тушгандан сўнг, қулф кодини юбориши керак бўлган.
Ҳозирда ҳолат юзасидан терговга қадар текширув ўтказилмоқда, унинг натижаларига кўра қонуний қарор қабул қилинади.
Изоҳ (0)