Ўзбекистонда 10 та назорат қилувчи орган томонидан тадбиркорлар фаолияти 105 та ҳолатда ноқонуний текширилган

Ўтган олти ойда 10 та назорат қилувчи орган томонидан тадбиркорлар фаолияти 105 та ҳолатда ноқонуний текширилган. Бу ҳақда АОКАда ўтказилган брифингда Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ўринбосари Жамшид Урунов маълум қилди.

6 ойи давомида 30 та назорат қилувчи орган томонидан тадбиркорлар фаолиятида жами 89 064 та текширув ўтказилган бўлиб, шундан 913 таси (1 фоизи) Бизнес-омбудсман билан келишилган ҳолда, қолган 88 151 таси (99 фоизи) уни хабардор этган ҳолда ўтказилган.

Шу билан бирга, ўтказилган текширувлар ҳудудлар кесимида таҳлил қилинганда Қашқадарё вилоятида – 9 419 та, Самарқанд вилояти – 6 932 та, Тошкент вилояти – 6 622 та тадбиркорлик субъектлари фаолиятида текширувлар ўтказилганлиги маълум бўлди.