Қашқадарё вилоятининг Шаҳрисабз туманида мусиқа фани ўқитувчиси кекса ёшли отахонни пичоқлаб қўйди. Бу ҳақда «Дарё»га туман ИИБ масъул ходими хабар берди.
Маълумот берилишича, мазкур масала вилоят ИИБ Тергов бошқармаси бошлиғи Хуршид Атаназаров иштирокида муҳокама қилинган.
«Халқимизда кўзингни чиқмай қўриқла деган гап бор. Биз мана шу гапнинг мазмун моҳиятини унутиб қўйдик. Арзимас гап талашувда ҳам пичоқ ишлатаяпмиз. Бу эса барчамизга қимматга тушмоқда», — дейди Хуршид Атаназаров мазкур масала муҳокамасига бағишланган йиғилишда.
Муҳокамада сўз олганлар ўқитувчи бошқа инсонларга ўрнак бўлиши лозимлиги ҳақида гапириб, мазкур воқа маҳалла аҳолисини ҳайратга солганини яширмади.
Масъулларнинг маълумот беришича, 2022 йил 23 август куни соат 20:00 ларда Шаҳрисабз туманининг «Қўшчинор» маҳалласида яшовчи 62 ёшли отахон М.Н. қишлоқдаги лалми ер майдонига сув қуйиш ишлари билан овора бўлиб турганда 44 ёшли ўқитувчи С.Н. маст ҳолда шу далага келиб, сигирини қўшнисининг даласига боқмоқчилигини айтган ҳамда отахон билан тортишиб қолган.
«Жанжал вақтида дастлаб отахон қўлидаги кетмон билан ўқитувчинининг чап қўл билак соҳасига бир марта урган. Бундан жаҳли чиққан ўқитувчи ўзи билан бирга молларининг ипини кесишда фойдаланиш учун олиб келган елим дастали ошхона пичоғини отахоннинг чап томон қорин қисмига бир марта санчиб олган. Жанжал натижасида отахон ва ўқитувчи тан жароҳати олган. Шунга қарамай улар уйига қайтган. Уйга боргач, отахоннинг тоби қочган. Акаси эса тез ёрдам чақирган. Туман тиббиёт бирлашмасида кўрсатилган малакали тиббий ёрдам натижасида отахоннинг ҳаёти сақлаб қолинган», — дейди ИИБ ходими.
Мазкур ҳолат юзасидан Шаҳрисабз туман ИИБ Тергов бўлими томонидан Жиноят кодексининг 104-моддаси 2-қисми «л» банди (қуролни ёки совуқ қурол сифатида фойдаланилиши мумкин бўлган ашёларни ишлатиб, қасддан баданга оғир шикаст етказиш) билан жиноят иши қўзғатилиб, ўқитувчи ушланган.
Изоҳ (0)