Шоу-бизнесни миш-мишлар олами дейиш ҳам мумкин. Чунки унда асосли ёки мутлақо асосиз бўлган миш-мишлар кўп учрайди. Шундай миш-мишлардан бир нечтаси машҳурларнинг ҳамкасбига кўнгил қўйгани билан боғлиқ. Қуйида мухлислар оила қуришини истаган, бироқ тақдир йўллари турли сабабларга кўра боғланмаган машҳурлар ҳақида сўз боради.
Сардор Тоиров ва Райҳон Асадова
Уларнинг илиқ муносабатлари ҳақидаги гап-сўзларга Райҳон хонанданинг бир нечта клипларида суратга тушгани сабаб бўлган. Хусусан, улар «Бахтингни топ», «Севмасам» ва «Ҳасрат» каби клипларда севишган жуфтлик ролини ижро этишган. Балки уларнинг ҳаётда бирга бўлишларини мухлислари кўпроқ исташгандир. Аммо ижодкорлар миш-мишлар асоссиз, улар фақатгина ижодий ҳамкор эканликларини билдириб ўтишган.
Хонанда Сардор Тоиров шу йилнинг март ойида уйланди. Актриса Райҳон Асадова бир гуруҳ ҳамкасблари билан тўйга ташриф буюриб, келин-куёвни табриклади.
Азиз Раметов ва Зара Ширинова
Улар ҳақидаги миш-мишларни асосиз деёлмаймиз. Чунки ижодкорларнинг ўзи ҳам бу гапларнинг ҳақиқат эканлигига ишора қилишади.
— Азиз Раметов ҳақида гапиришни истамайман. Чунки энди унинг оиласи бор, насиб қилса, мен ҳам турмушга чиқяпман. Унга бахт тилайман, — деди бошловчи Зара Ширинова.
Азиз Раметов шу йилнинг март ойида оила қурди. Зара Ширинованинг тўйи эса шу йилнинг октябрь ойига белгиланган.
Азамат Аҳроров ва Шаҳзода Муҳаммедова
Ижодкорлар орасидаги миш-мишларнинг тарқалишига «Асал ойи» фильмида бирга суратга тушишгани сабаб бўлган. Аммо кўп ўтмай бу шунчаки миш-миш эканлигини ва ўрталарида ҳеч қандай ишқий муносабат йўқлигини айтишганди.
— Бу пиар эмас эди, Азамат Аҳроров ҳақиқатан ҳам Шаҳзоданинг қўлини сўраган. Очиғини айтаман, мен бу масалага бошидан йўқ деб туриб олганман, ҳаттоки Шаҳзода билан қарама-қарши бўлиб, анча вақт гаплашмаганмиз. Ўғлим ҳам, мен ҳам норози бўлганмиз, фақат қайнонам, ҳожи она Шаҳзодага ён босган. Уни бўйнимга оламан, чунки онанинг дуосисиз сен турмуш қура олармикансан, деганман. Мени норози қилиб, бу бола билан турмуш қура олмайсан, турмуш қурганинг билан узоққа бора олмайсан, дедим.
У сенинг инсонинг эмас, деб айтганман. Онанинг юраги ҳис қилади, ичидан билади, мен ҳам Шаҳзоданинг инсони ким эканини сезганман. Куёвим Маратжондан таклиф бўлганда, аввалига, тўғри, йўқ деганман, кейин Москвага бориб, яхшилаб гаплашганман. Унинг гап-сўзини олганимдан кейин Шаҳзодага мана шу сенинг инсонинг, деганман. Шу инсон сени ҳар томонлама қўллаб-қувватлайди, санъатингга нуқта қўймайди, буни тушунади, сабаби у барибир замонавий, тушунадиган инсон деганман, хуллас, бир кўришда куёвим билан гап-сўзимиз бир-бирига тўғри келган», — дейди Гулмира Муҳаммедова.
Суғдиёна Азимова ва Азамат Аҳроров
Азамат Аҳроров ва Суғдиёна Азимованинг оила қуриши ҳақидаги миш-мишлар ҳам узоқ йиллар давом этди. Бунга уларнинг «Қайсаргинам» фильмида бир-бирига мос партнёр бўлгани сабабдир. Аммо икки ижодкор ҳам бу шунчаки миш-миш эканлигини ва улар ҳеч қачон оила қурмаслигини таъкидлаб келишган. Азамат режиссёрлигида суратга олган «Лола гулим...» фильмида хоразмлик Дилноза исмли қиз билан танишган ва оила қурган. Ҳозирда уларнинг икки нафар фарзанди бор.
Шаҳзод Султонов ва Зарина Йўлдошева
Бу ижодкорларнинг муносабатини миш-миш деёлмаймиз. Чунки улар YouTube’даги «Дон-дон» лойиҳасидан анча аввалроқ бир-бири билан таниш эди. Аммо муносабатлари кўпга бормади. Балки бунга актёрнинг Феруза Норматова билан вайнлар олишни бошлагани сабаб бўлгандир.
Шаҳноза Отабоева ва Миролим Қиличев
Шаҳноза Отабоева турмушга чиқмасидан аввал Миролим Қиличев билан ҳамкорлик қилган. Яъни актёр Шаҳноза Отабоеванинг продюсери ва тўй хизматларида бошловчи вазифасини бажарган. Уларнинг фотиҳа тўйи бўлгани ҳақидаги миш-мишлар ҳам тарқалганди. Афсуски, хонанда Миролим Қиличев билан эмас, балки актёр Камол Бобоназоров билан оила қурган. Афсуски, уларнинг илиқ муносабатлари узоққа бормади.— Расман ажрашдим, энди бир-биримизга бегонамиз. Унинг ўз ҳаёти, менинг эса ўз ҳаётим бор. Ҳозирча оила қуриш ҳақида ўйламаяпман. Икки ўғлимга яхши она бўлиб, уларнинг бахтли бўлиши учун яшаш ниятидаман, — дейди хонанда Шаҳноза Отабоева.
Ҳа дарвоқе, Миролим Қиличев ҳам уйланган, аммо хонанда ҳам ижодий ҳамкорлигини сақлаб қолган.
Муниса Ризаева ва Жасур Ғойипов
Хонанда Муниса Ризаева ва Жасур Ғойиповнинг оила қуриши ҳақидаги маълумотлар 2014 йили тарқалганди. Афсуски, орадан кўп ўтмай бир-бирига қарши берилган интервьюлар уларнинг оила қуриши ҳақидаги хаёлларни пучга чиқарди.
Муниса билан тўйимиз бўлмагани, аввало, тақдир. Бунга кўп нарсалар сабаб бўлиб қолди. Муниса иккаламизни «ўқитиб» ажратиб юборишди. Бизнинг энг катта хатомиз — тўйимиз бўлаётганини оммага чиқариб юборганимиз. Муносабатларимиздан PR қилмоқчи бўлмаганмиз. Мен ҳозир ҳеч нарса дея олмайман. Балки муносабатларимиз яна тикланар, эртага нима бўлишини ҳеч ким билмайди. Мен ҳозир бўйдоқман, ҳамма нарса бўлиши мумкин. Муниса билан эслайдиган хотираларимиз кўп, у билан ҳозиргача яхши муносабатдамиз, — деб интервью берганди Жасур Ғойипов.
Ситора Фармонова ва Дониёр Қаюмов
Актриса Ситора Фармоновага ўзидан 15 ёш кичик бўлган инстаблогер Дониёр Қаюмов севги изҳор қилганди. Афсуски, уларнинг шов-шувга айланган муносабатлари бир ойга бормай дарз кетди.Дониёр Қаюмов Ситора қўнғироқларига жавоб бермаётгани, бирга тушган суратларини ҳам Instagram тармоғидан олиб ташлагани ҳақида маълум қилганди. Аммо кузатувчилар уларнинг муносабатини шунчаки пиар деб изоҳлашганди. Бу миш-мишлардан кўп ўтмай Дониёр Қаюмов бошқа қиз билан оила қурди.
Ойдин Юсупова ва Аҳад Қаюм
Шоир Аҳад Қаюм ва актриса Ойдин Юсупова ҳақидаги гап-сўзлар ҳам одамлар орасида овоза бўлганди. Аҳад Қаюм актриса билан илиқ муносабатда эканлигини билдирса, Ойдин унинг сўзларини инкор этарди. Ҳатто актриса Аҳад Қаюм ундан пиар учун фойдалангани ва номини булғагани ҳақида айтиб ўтганди.
Имрон ва Дурдона Қурбонова
Мухлислар орасида хонанда Имрон ва актриса Дурдона Қурбонованинг ишқий муносабатлари ҳақидаги миш-мишлар тарқалганди. Аммо уларнинг иккиси ҳам бу гаплар асоссиз эканлиги ҳақида айтишган.Имрон Дурдона клиплардаги доимий партнёри бўлгани ва аёлини тўйдан аввал 2,5 йил кутгани ҳақида маълумот бериб ўтганди. У 2021 йили уйланиб, айни дамда бир фарзанднинг отаси ҳисобланади.
Мавзуга доир:
- Энг ҳаяжонли кун: ўзбек шоу-бизнеси вакилларининг никоҳ оқшомидаги суратлари (фото)
- Қиморга тикилган, оёғи синдирилган ва қорнидаги боласи туширилган: Турмуш ўртоғининг руҳий ва жисмоний зўравонлигига учраган ўзбек шоу-бизнеси вакиллари (фото)
- Биринчи турмуши омадсизликка учрагач, иккинчи ёки учинчисидан бахт топган ўзбек шоу-бизнеси вакиллари (фото)
Изоҳ (0)