Самвел Бабаян: «Навбаҳор» ғалабага яқин эди, рақиб мураббийининг фикри менга умуман қизиқ эмас

«Навбаҳор» клуби бош мураббийи Самвел Бабаян Суперлига 17-тури доирасида «Пахтакор»га қарши кечган ўйиндан кейин ўз фикрлари билан ўртоқлашди.

Ўйин ҳақида

Тахмин қилинганидек ўйин ҳеч кимни эътиборсиз қолдирмади. Чемпионатнинг икки етакчиси ўртасидаги баҳс бўлди. Менимча, бу баҳс даражаси ОЧЛ билан баравар бўлди. Ғалабага яқинроқ эдик, агар иккинчи бўлимда қулай имкониятлардан фойдалана олганимизда 3 очко олардик. Умуман олганда йигитларнинг шижоати ва футболчиларимнинг ўйин сифати қониқтирди. Кийим алмаштириш хонасида айтган гапларимизни барчасини майдонда амалга оширишди.

Яхшибоевнинг йўқлиги борасида

Жасурнинг бувиси айни пайтда оғир касал. Айнан бувиси Жасурнинг футбол билан шуғулланишига сабабчи бўлган. Бувиси ёшлигида қўлидан ушлаб футболга олиб борган. Жасур ҳозир оиласи даврасида. Бундай ҳолатда уни тушундик ва жавоб бердик.

«Пахтакор»га қарши ўтадиган кубок ўйин ҳақида

Кубок баҳси ҳақида гапиришга ҳали эрта. Сабаби бу ўйинни таҳлил қилишимиз керак. Ўз майдонимизда, мухлисларимиз билан бирга «Пахтакор»га қарши ўйнаймиз, барибир кубок доирасида қайсидир босқичда тўқнаш келишимиз мумкин эди.

Демак бу чорак финалда содир бўлар экан. Мавсумни безаб берадиган яна битта қизиқарли ўйин бўлади. Шундай экан кубок учрашувига максимал тайёргарлик кўрамиз.

Ғалаба қўлдан чиқарилгани сабаб ҳақида

Сабаби «Пахтакор» футболчиларининг сифати. Бугунги кунда бу клуб терма жамоанинг ўзагини ташкил этади. Биз кўрсатган ўйин эса йигитларимиз юқори даражада ўйнай олиши ва натижага эриша олишини кўрсатди.

«Навбаҳор» голдан кейин ҳимояга эътибор қаратгани борасида

Гол ўтказган вазиятимизда рақиб позицион ҳужумда эди, чап қанот ҳимоясидагилар бир-бирининг ўрнини тўлдира олмади. Шу боис рақиб футболчиси эркин ҳаракат қилди. Биз юқори прессинг намойиш этдик, рақиб ҳимоячиларига босим қилдик.

Эртами-кеч бундай юқори савиядаги футболчилар ташаббусни ўз қўлига олиши шубҳасиз. Фақат гол ўтказган вазиятни ҳисобга олмаганда позицион ҳимояланишни яхши амалга оширдик.

Шацкихнинг «икки очко йўқотдик» деган гапига муносабати

Бошида айтдим-ку, иккинчи бўлимда биз гол уришга яқин эдик. Статистика бор, турли фактлар бор. Шу боис шахсан менинг фикримча биз ғалабага яқин эдик. Рақиб бош мураббийининг фикри эса менга умуман қизиқ эмас. Барча майдондаги футболни кўрди.

Кўпчиликка «Навбаҳор»нинг ўйини қизиқ эди. Менимча, ўйин сифати бўйича рақобатбардош жамоага айландик. Балки қайсидир жойларда хато қилгандирмиз, аммо яратган барча нарса ўзимизники. Қиладиган ишларимиз бор, кубок ўйинигача кўп хатоларни тўғрилашга ҳаракат қиламиз.

«Пахтакор»га урилган голни эҳтирос билан нишонламагани ҳақида

Сабаби ҳали ўйин тугашига анча вақт бор эди. Иш охирига етмаганди. Ҳурмат қилишга келсак, барча билади менинг ДНКам — бу «Пахтакор». Унинг тарихига ҳурматим доим баланд, сабаби ўзим унинг бир қисми бўлганман. Доим ҳиссиётларни ушлаб туриш керак.

Рақиб уч марказий ҳимоячи билан ўйнагани борасида

Албатта, биз учун кутилмаган ҳол бўлди, аммо қанотлардаги ўйинда бизга ёрдам берди. Кубок баҳсида кучли жамоа ғолиб бўлсин.

Самвел Бабаян, «Навбаҳор» бош мураббийи