Бугун,

  • USD 10940.05
  • RUB 182.26
  • EUR 11121.65

Британиялик таниқли хонанда, бастакор Сами Юсуф нима сабабдан Ўзбекистонга келгани, отаси унинг мусиқачи бўлишини истамагани, миллати, турмуш ўртоғи ва ўзбек бастакорлари билан ҳамкорлик қилиш нияти борлиги ҳақида сўзлаб берди.

Интервью давомида хонанда Самарқанд унинг тасаввуридан бошқачароқ экани, бу шаҳар Буюк Ипак йўлининг «юраги» бўлгани ва унинг ижодига ижобий таъсир этгани ҳақида гапирди.

«Самарқанд менинг ижодимга ижобий таъсир этадиган даражада муҳим аҳамиятга эга, чунки бу шаҳар Буюк Ипак йўлининг ‘юраги’ мисол. Менинг мусиқамда мана шу йўлларда юзага келган маданиятлар ўз аксини топган.

Тасаввурларимга келадига бўлсак, Самарқанд менинг тасаввурларимдан гўзалроқ шаҳар экан, чунки фотосуратларда кўрганимда уларни бўялган ёки қандайдир ишлов берилган деб ўйлаганман. Бу гўзал шаҳар ҳақиқатан бор, буни ҳар бир инсон ўз кўзи билан кўриши керак», — дейди хонанда.

Фото: Instagram /@samiyusuf

Фото: Instagram /@samiyusuf

Хонанда турмуш ўртоги ва миллати ҳақида

«Инсон ўз турмуш ўртоғини севиши ёки севмаслиги мумкин, лекин мен турмуш ўртоғим борлигидан жуда бахтиёрман. Биз-биримизни жуда ёқтирамиз, шунингдек, энг яқин дўстлармиз, бир-биримизга ўхшаймиз ва бир-биримизни тўлдирамиз. Мукаммал инсон бўлишингиз, сизга ҳамроҳнинг кераги йўқ бўлиши мумкин, бироқ ёнингизда яқин, сизга дўст инсоннинг бўлиши ҳаётдаги буюк неъматдир», — дейди бастакор.

«Аслида ўз келиб-чиқишим, аждодларим билан фахрланаман. Миллатим озарбайжон, мен ўзимни туркий-озарбайжон деб ҳисоблайман ва турк бўлганимдан фахрланаман», — дейди Сами Юсуф.

Фото: Instagram /@samiyusuf

Фото: Instagram /@samiyusuf

Сами Юсуфнинг отаси унинг хонанда бўлишини истамагани ва бастакор қайси соҳада таҳсил олгани тўғрисида 

«Менимча ҳар қандай ота ўз фарзандини мусиқачи бўлиш фикридан қайтаришга ҳаракат қилади, чунки мусиқа, актёрлик, умуман олганда санъат соҳаси даромадли соҳа эмас. Даромад барқарор ва доимий эмас.

Отам британиялик, у ерга муҳожир сифатида келган, шунинг учун аксарият муҳожирлар каби уни ҳам муҳандис, шифокор, ҳуқуқшунос бўлишга ундашган. Бу касблар ишончли, барқарорлик бор, очиғи мен ҳам буни хоҳлардим. Мен мусиқа бизнесига, бу соҳага ёшлигимда кириб келганман ва унинг ёқимсиз жиҳатини ҳам кўрганман. Шунинг учун ҳуқуқшунослик йўналишида таҳсил олишни ва уни охирига етказишни ният қилдим. Мусиқа менинг ҳаётим», — дейди бастакор.

Фото: «Дарё»

Фото: «Дарё»

Шунингдек, Сами Юсуф ўзбекистонлик бастакорлар билан ҳамкорлик қилиш нияти борлиги, тажриба орттиришни исташи ва ўзбек оҳангини дунёга олиб чиқиш орзусида экани ҳақида гапирди.

«Ўзбекистонлик бастакорлар билан ҳамкорлик қилиш ва ишлаш учун тайёрман. Мен анъанавий мусиқа шайдосиман, уни севаман, унга чуқур муҳаббатим бор. Тажриба орттиришни, мусиқий директор ёки бастакор бўлиб ишлашни истайман. Ўзбек оҳангини дунёга олиб чиқмоқчиман, саёҳат қилмоқчиман, мен бу режамнинг амалга ошишини жуда истайман», — дейди Сами Юсуф.

«Рафиқамни Ўзбекистонга олиб келаман»

«Ажойиб, ноёб таассурот учун атрофга бир қаранг. Ўйлайманки, бу руҳиятни бошқа ҳеч қаердан топа олмайсиз, музейларда ҳам у йўқ. Меҳмондўстликни ҳис қилиш, бу юрт инсонлари билан танишиш учун келиш керак. Обидалари, мусиқаси учун келиш керак, туризм учун барча имкониятлар мавжуд. Мусиқа, маданият, санъат асарлари, турли тадбирларни томоша қилиш учун келиш керак. Мен бу ерга турмуш ўртоғим билан албатта турист сифатида келаман», — дейди Сами Юсуф.

Мавзуга доир:

Изоҳ
Асосий янгиликлар