Комик роллари билан мухлислар қалбидан жой олган актриса Зуҳра Солиева «Омон-Омон» кўрсатувига берган интервьюсида ошқозон кичрайтириш операциясидан сўнг салкам 60 килограмга озгани, бу операция учун уйини сотгани ва ташқи кўриниши сабаб ролларга таклиф этилмай қўйгани ҳақида тарқалган миш-мишларга жавоби, операция қилдириш бўйича ундан қайси шоу-бизнес вакиллари маслаҳат сўрагани, операциянинг салбий томонлари, хонандаликда ҳам ўзини синаб кўраётгани ҳақида гапирди.
Зуҳра Солиева уйини сотиб ошқозон кичрайтириш операциясини қилдирганми?
«Зуҳра Солиеванинг ҳозиргача уйи бўлмаган ва ҳали ҳам йўқ. Йиғган пулимга операция қилдирганман, у пулга битта уйнинг ромини ҳам бермайди. Операция уйдан анча арзон. Ўйлаб қарасам, соғлиғимга аста-секин зарар етяпти, кундан-кун орқага кетаётганимни сездим», — дейди актриса.
Актриса операциядан сўнг салкам 58 килограммга озгани ҳақида
«Аввал 110 килограмм эдим, ҳозир вазним 62 килограмм бўлган. Дўмбоқ эдим, кейинчалик соғлиғим ёмонлашгани сабаб у шишга айланди. Докторлар ҳозир ҳаммаси яхши дейишяпти.
Оддий инсон ҳам, яъни бу муолажани қилмаган инсон ҳам шифокорга борса, у нима ейсиз, иложи борича ёғли овқат, кўп ширинлик, ун маҳсулотларидан бўлган овқатни еманг дейди. Ушбу муолажада инсон ўзини автоматик равишда шу нарсалардан тияркан. Ўзи овқатга ружу қўйган одам эмасман, олдин ҳам кам овқат ердим, кўп инсонлар шишиб кетганимга, камроқ овқат ейишим кераклигини ва кейин озишим мумкинлигини айтди. Менга бу гап ёқмас эди, чунки кўп овқат ейдиган одам эмасман», — дейди Зуҳра Солиева.
Зуҳра Солиева операциянинг салбий томони ва бу операциядан сўнг ўз устида ишлаётгани ҳақида
«Салбий томони кўп овқат ейилса, 5, 6 йилдан кейин ошқозон яна кенгайиб кетади. Ошқозон шунақа орган, у инсоннинг ўз қўлида. Операция қилдирдим, бўлди, ёнбошласам озиб кетаман деб айтиш керак эмас. Инсон ўзининг устида ишлаши керак. Менга операциядан кейин яхши натижа бўлганини айтишди. Мен ҳам операция қилдириш билан чекланмадим, спорт билан мунтазам шуғулланаман. Олдин нима овқат еган бўлсам ҳаммасини ея оламан, фақат буни ўзимга эп кўрмаяпман», — дейди актриса.
Актриса ошқозон кичрайтириш операциясини қайси шоу-бизнес вакилларига тавсия қилган?
«Тавсия берганларим ҳам, маслаҳат сўраганлари ҳам бўлди. Масалан, Феруза Жуманиёзова, Шаҳноза Отабоева, Муяссар Бердиқулова мендан бу ҳақда сўради», — дейди Зуҳра Солиева.
«Албатта операциянинг салбий томонларини ҳам ўргандим. Биринчи навбатда шифокор танлашга алоҳида эътибор бераман, унинг қайси олийгоҳни битиргани, қандай ишлар қилганини, беморлари ундан мамнунми, шуни ўрганиб кейин бораман. Бу операциянинг битта минус томони агар овқат ейишни яхши кўрувчилар бўлса, олдингидек икки коса, уч коса ёки бир коса овқат емайди ва олдин еган нарсаларининг ярмининг ярмини ейди. Унда ортиғини ошқозон кўтармайди», — дейди актриса.
Зуҳра Солиева операция қилдирганидан кейин кинога таклиф қилинмаётгани ҳақида тарқалган миш-мишларга жавоби
«Таклифлар операция қилдиришимдан олдин ҳам, ҳозир ҳам камайгани йўқ. Бироқ ҳозир аввалги образларимга қўрқиб-қўрқиб чақиришмоқда, чунки у пайтда шаддод, кўп жанжал қиладиган, чўрткесар аёлларнинг образини яратганман. Олдин гавдаси шунақа, шунга мос рол ўйнайди деб чақиришарди, ҳозир озганимдан кейин унақа образларга қўрқиб чақиришади. Бунақа ‘кичкина’ Зуҳра бўлиб образларни қандай ўйнайди деб ўйлашган. Образ менинг ичимда, уни ‘кесиб’ ташламадим. Шунинг учун улар чақиргандан кейин пушаймон емаяпти, ўша-ўша экансиз дейишмоқда», — дейди актриса.
Актриса хонандаликда ўзини синаб кўраётгани тўғрисида
«Хонандаликка ҳеч қачон даъвогарлик қилмаганман. Тўй-маросимларда ҳам қўшиқ айтаман, қанақа қўшиқ айтасиз деб сўрашса, ўзимни қўшиғимдан ташқари барчаникини деб жавоб бераман. Профессионал даражада ёндашиб қўшиқчи бўлмасман, лекин яхши композитор ўзимга шеър, матнлари ёқадиган қўшиқ олиб келса, мана буни айтинг, сизнинг қўшиқ айтганингиз ёқди, деса айтаман», — дейди Зуҳра Солиева.
Мавзуга доир:
- Зуҳра Солиева ошқозонини кичрайтириш операциясидан сўнг икки ойда 15 кг озганини маълум қилди (видео).
- Instagram: Операцияни бошдан кечирган Зуҳра Солиева, Юлдуз Усмонованинг навбатдаги мурожаати, Нигора Каримбоева Дилноза Кубаевадан қизғанган рол.
- «Мана сенга бола, деб ичимга тепарди». Зуҳра Солиева турмуш ўртоғи томонидан мунтазам калтаклангани ҳақида сўзлаб берди (видео).
- Саида Раметова жияни Зуҳра Солиева ҳақида: Унинг қанотларини синдиришни истамайман (видео).
Изоҳ (1)
110 dan 58 bu ayirsa 62 qoladimi menimcha 52 qoladi