Ливия пойтахти Триполида қуролли гуруҳлар ўртасидаги тўқнашувлар оқибатида камида 23 киши ҳалок бўлди, 140 киши яраланди, деб хабар бермоқда ЛАНА давлат ахборот агентлиги Соғлиқни сақлаш вазирлигига таяниб.
Охирги маълумотларга кўра, 83 нафар жабрланувчига биринчи тиббий ёрдам кўрсатилиб, улар уйига юборилган.
Аввалроқ 12 киши ҳалок бўлгани ва 87 киши яралангани ҳақида хабар берилганди. Улар орасида қанча жангари ва тинч аҳоли борлиги номаълум.
Триполида тўқнашувлар 27 августга ўтар кечаси бошланган, шаҳарда портлашлар ва отишма овозлари эшитилган. Кейинроқ жанглар пойтахтнинг ғарбида жойлашган Жанзур шаҳри ҳудудига кўчган.
Тўқнашувларда икки қарама-қарши қуролли гуруҳ иштирок этмоқда. Биринчи гуруҳ Ливия Миллий бирлик ҳукуматининг (GNU) амалдаги раҳбари Абдулҳамид Дбейбу тарафдорларидан иборат — Дбейбу сайловгача ҳокимиятни топширишдан бош тортмоқда. Иккинчи гуруҳ аъзолари парламент томонидан тайинланган бош вазир Фатҳи Башагани қўллаб-қувватламоқда.
Сиёсий беқарорлик Ливияда 2011 йилда Муаммар Қаддафий ҳокимиятдан ағдарилиб, ўлдирилганидан буён кузатилмоқда. Мамлакатда ягона бошқарув органини шакллантиришга эришилмади, оқибатда турли гуруҳлар орасида қуролли низо, кейинчалик эса халқаро тан олинган муваққат ҳукумат ва генерал Халиф Хафтар раҳбарлигидаги Ливия миллий армияси ўртасида фуқаролар уруши келиб чиқди.
Изоҳ (0)