Пашинян ва Алиевнинг 31 августдаги учрашувида Қорабоғ бўйича сулҳ шартномаси матнини тайёрлаш бошланиши мумкин

Озарбайжон президенти Илҳом Алиев ва Арманистон бош вазири Никол Пашиняннинг учрашувида Тоғли Қорабоғ атрофидаги келишмовчиликни ҳал қилиш бўйича сулҳ шартномасининг матнини тайёрлаш бўйича ишчи гуруҳи келишиб олиниши мумкин, деб ёзади «Коммерсантъ» Озарбайжон президентининг ёрдамчиси Ҳикмат Гажиевга таяниб. Музокаралар 31 август куни Брюсселда бўлиб ўтиши керак.

«Шу ой охирида Брюсселда Евроиттидоқ Кенгаши президенти Шарль Мишель воситачилигида Озарбайжон ва Арманистон етакчилари учрашуви бўлиб ўтади. Озарбайжон томони ушбу учрашувда Озарбайжон ва Арманистон ўртасидаги сулҳ битимининг матнини тайёрлаш бўйича ишчи гуруҳ тузишга келишиб олинишига умид қилмоқда», — деди Ҳикмат Гажиев журналистларга.

Гажиевнинг қўшимча қилишича, август охирига Арманистон ва Озарбайжон бош вазирларининг учрашуви ҳам белгиланган. Улар транспорт-коммуникация алоқаларини ҳамда Озарбайжон ва Арманистон чегаралари делимитациясини муҳокама қилиши кутилмоқда.

Брюсселдаги учрашув 31 август куни ўтказилиши керак. Унда Еврокенгаш раҳбари Шарль Мишель ҳам иштирок этади. Музокараларда Қорабоғ низосини тинч йўл билан тартибга солиш муҳокама қилинади. У сўнгги марта 2020 йилда кескинлашган эди.

Аввалроқ Озарбайжон армияси мамлакат ғарбидаги Лочин шаҳрини эгаллагани, Сус ва Забух қишлоқлари Боку назорати остига олингани хабар берилган эди. Ушбу аҳоли пунктлари 2021 йилда низо кескинлашганидан кейин тузилган уч томонлама битимга мувофиқ, Арманистон ва Тоғли Қорабоғни боғловчи ягона қуруқлик йўли — олти километрли Лочин йўлагининг бир қисми ҳисобланади.

Арманистон ва Озарбайжон Россия воситачилигида уч томонлама битимни 2020 йил ноябрида имзолаган эди. Алиев шартномани ғалаба деб атади, Арманистон бош вазири Никол Пашинян қуролли низони тўхтатиш учун уни имзолашга мажбур бўлганини айтди. Минтақага Россия тинчликпарварлари жойлаштирилди.

Иккала томон ҳам битимнинг ижро этилиши юзасидан норозиликлар билдирган. Алиев Арманистонни Тоғли Қорабоғдан ўз қўшинларини олиб кетишдан бош тортишда айблаган ва Россия Мудофаа вазирлиги юқори мансабли вакили (кимлигига аниқлик киритилмаган) шундай ваъда берганига қарамай, прогрессга эришилмаганини айтган.