Европада газ нархи 3 минг доллардан пастга тушди

Лондоннинг ICE Futures биржасида Европа учун газ нархи 10 фоизга арзонлашди. Бу ҳақда «Коммерсантъ» хабар бермоқда.

Бир ҳафта ичида биринчи марта нарх минг куб метр учун 3 минг доллардан пастга тушди. Газнинг сентябрь фьючерслари 2 915 долларгача арзонлади.

25 август куни газнинг спот нархи март ойи бошидан буён рекорд даражага етган эди — 3,5 минг доллар. 

7 март куни газнинг биржа нархи тарихда биринчи марта минг куб метр учун 3 900 долларгача кўтарилган эди. 

«Газпром» бу қишда Европада газ нархи минг куб метр учун рекорд даражадаги 4 минг доллардан ошишини прогноз қилган эди. 

Европада газ нархи бир неча омиллар туфайли кўтарилмоқда. Булардан бири шамол тегирмонларидан электр энергияси ишлаб чиқаришни камайтирадиган ва сув йўллари орқали кўмир ташишни қийинлаштирадиган иссиқлик ва қурғоқчилик. 

Бундан ташқари «Шимолий оқим» газ қувурининг 31 августдан 2-сентябргача режалаштирилган тўхтатилиши муносабати билан суюлтирилган газ етказиб бериш бўйича Осиё фьючерсларининг ўсиши туфайли нарх ошмоқда.