Тошкентда икки кишига хориждаги ОТМда ўқигани тўғрисида сохта ҳужжатлар тайёрлаб бермоқчи бўлган шахс ушланди

Бош прокуратура ҳузуридаги департамент ўқишга киритиб қўйиш ва кўчириб бериш билан боғлиқ навбатдаги фирибгарлик ҳолатларини аниқлади.

Департаментнинг Тошкент шаҳар бошқармаси томонидан ДХХ ходимлари билан ҳамкорликда ўтказилган тезкор тадбирда, фуқаро Х.М. фуқаролар З. ва Ш.нинг ишончига кириб, уларга хориждаги олий ўқув юртида ўқиганлиги тўғрисида сохта ҳужжатлар тайёрлаб бериш орқали Тошкент шаҳридаги олий таълими муассасаларига кўчириб бериши эвазига 7 200 долларни олган вақтида ашёвий далиллар билан ушланган.

Шу каби, Янги Наманган туман бўлими томонидан ўтказилган тезкор тадбирда, фуқаро К.А. фуқаро Ш.ни гўёки Тошкент шаҳарида юқори лавозимда ишловчи танишлари орқали 1 000 доллар эвазига Наманган давлат университетининг «Мусиқа» йўналишига ўқишга киритиб қўйишни ваъда қилиб, шундан 500 долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Мавзуга доир:

• Гулистон давлат университетига ўқишга киритиб қўйиш эвазига 10 минг доллар олган шахс ушланди
• Самарқандда фуқародан олийгоҳга киритиб қўйиш учун 4000 доллар пора олган шахс ушланди