Жорий йил 10 августга ўтар кечаси Наманган вилоятининг Чортоқ туманидаги Султон Увайс Қароний зиёратгоҳида сақланаётган Қуръони Карим қўлёзмасини ўғирлаб кетган шахслар қўлга олинди. Бу ҳақда «Дарё» мухбири Азизбек Абдувалиев хабар бермоқда.
Вилоят ИИБ матбуот хизмати раҳбари Шокиржон Ҳошимовнинг «Дарё»га маълум қилишича, қўлга олинганлардан бири Чортоқ тумани, иккинчиси эса Наманган шаҳрида яшовчи фуқаролар бўлган.
Китоб Наманган шаҳрининг Навоий кўчасида жойлашган кўп қаватли уйлардаги хонадонлардан бирида сақлаб келинган.
Дастлабки маълумотларга кўра, Қуръони Каримнинг қўлёзма нусхасига ҳеч қандай зарар етмаган.
Гумонланувчилар Жиноят-процессуал кодексининг 221-моддаси тартибида ушланиб, қамоққа олинган. Ҳозирда олдинроқ қўзғатилган жиноят иши бўйича тергов ҳаракатлари давом эттирилмоқда.
Эслатиб ўтамиз, Султон Увайс Қароний зиёратгоҳида сақланган Қуръони Карим қўлёзмаси ҳажми жиҳатидан Ўзбекистон мусулмонлари идораси тасарруфидаги Усмон Мусҳафидан кейинги иккинчи ўринда туради.
Изоҳ (0)