АҚШ Украинага яна 800 млн долларлик ҳарбий ёрдам ажратишни режалаштирмоқда — Reuters
АҚШ 19 август куни Украинага 800 миллион долларлик янги ҳарбий ёрдам пакети берилишини эълон қилади, деб ёзмоқда Reuters агентлиги уч нафар манбага таяниб.
Суҳбатдошларга кўра, президент Жо Байден давлат раҳбарининг АҚШ захираларидаги «ортиқча қуроллар»ни юбориш имконини берувчи ваколатларидан фойдаланади. Қайси турдаги қуроллар ҳақида гап кетаётгани айтилмаган.
Бир ҳафта олдин, 8 август куни АҚШ расмийлари Украинага ёрдам бериш учун 1 миллиард доллар ажратаётганини эълон қилганди. Ёрдам пакетига HIMARS баравар ўт очувчи реактив тизимлар учун ракеталар, NASAMS зенит-ракета тизимлари учун ўқ-дорилар, 50 та М113 зирҳли тиббий транспорт воситалари, шунингдек, артиллерия ўқ-дорилари, мингта FGM-148 Javelin танкка қарши портатив тизимлар, дори воситалари ва портловчи моддалар киритилган.
Февраль ойида Россия босқини бошланганидан бери АҚШнинг Украинага берган ҳарбий ёрдами умумий миқдори 9,8 миллиард долларга етди.
Уруш бошланганидан кейин Ғарб давлатлари Киевга қурол етказиб беришни кучайтирганди. Хусусан, Украина Қўшма Штатлардан 16 та HIMARS тизимини (MLRS) олган, Пентагон жами 20 дан ортиқ бундай тизимларни ваъда қилди. Буюк Британия ҳам Украинани MLRS билан таъминламоқда. Мамлакатга юборилган бошқа қуроллар қаторида Javelin ва NLAW танкка қарши тизимлари, Stinger зенит тизимлари, Старстреак ҳаво ҳужумидан мудофаа тизимлари ва бошқалар бор. Украина президенти Владимир Зеленский қўшимча таъминот ҳисобига урушда «бурилиш нуқтаси» учун имконият борлигини айтган.
