Европада нархлар ошиши июль ойида рекорд даражага етди

Евроҳудудда истеъмол нархлари июль ойида йиллик ҳисобда 8,9 фоизга ошди. Бу ҳақда Европа статистика бошқармаси маълумотларига таяниб, «Интерфакс» хабар бермоқда.

Бу кўрсаткич маълумотларни ҳисоблаш бошланган бери максималдир. Июнь ойида минтақадаги инфляция 8,6 фоизга бўлган эди.

Инфляция Европа Марказий банкининг (ECB) 2 фоизлик кўрсаткичидан тўрт баравар юқори бўлмоқда.

Eurostat маълумотларига кўра, энергия нархлари ўтган йилнинг июлига нисбатан 39,6 фоизга ошган, бироқ ўсиш суръати бир ой олдинги 42 фоиздан пасайган.

Озиқ-овқат, алкоголь ва тамаки маҳсулотлари 9,8 фоизга (июнь ойида 8,9 фоизга), саноат маҳсулотлари 4,5 фоизга (июнь ойида 4,3 фоизга), хизматлар 3,7 фоизга (июнь ойида 3,4 фоизга) қимматлашди.

Озиқ-овқат ва энергиядан ташқари истеъмол нархлари ўтган ойда июнь ойидаги 3,7 фоиздан 4 фоизга ўсди.

Европа Иттифоқида энг паст инфляция Мальта (6,8 фоиз), Франция (6,8 фоиз) ва Финляндияда (8 фоиз), энг юқори инфляция Эстония (23,2 фоиз), Латвия (21,3 фоиз) ва Литвада (20,9 фоиз) қайд этилган.

Аввалроқ Буюк Британияда нархлар ошиши 40 йиллик рекорд даражага етган эди