«Газпром»нинг «Шимолий оқим» газ қувури орқали Европага газ етказиб бериш ҳажми пасайишда давом этяпти. Бу ҳақда «Коммерсантъ» хабар бермоқда.
Европада газ нархи ўсишда давом этмоқда ва 16 августда минг куб метр учун 2,6 минг долларга етди.
«Газпром»нинг ўзи қишда нархлар минг кубометр учун 4 минг долларгача кўтарилиб, янги мутлақ рекорд ўрнатиши мумкинлигини маълум қилди.
«Газпром»нинг 2022 йилнинг етти ярим ойи давомида МДҲдан ташқари давлатларга экспорти ўтган йилнинг шу даврига нисбатан 36,2 фоизга камайиб, 78,5 миллиард куб метр газни ташкил қилди.
Компаниянинг аниқлик киритишича, узоқ муддатли шартнома асосида Хитойга «Сибир қудрати» газ қувури орқали етказиб бериш ҳажми ортиб бормоқда.
Бу даврда «Газпром»нинг ишлаб чиқариш ҳажми 13,2 фоизга, яъни 274,8 миллиард куб метргача, ички газга бўлган талаб эса 2,3 фоизга камайди.
Ҳисоб-китобларга кўра, август ойининг биринчи ярмида Европага газ етказиб бериш июль ойининг биринчи ярмига нисбатан бироз ошди — июлнинг биринчи 15 кунидаги 3 миллиард куб метрга нисбатан 3,2 миллиард куб метргача.
Нархлар кескин ўсишининг асосий сабабларидан бири Россиядан Европага олиб борадиган асосий йўналиш — «Шимолий оқим» газ қувури бўйлаб етказиб беришнинг кескин қисқариши бўлиб, у максимал қувватининг атиги 20 фоизида ишламоқда.
Бундан ташқари, Европадаги вазият олти ой ичида энг паст даражада бўлган LNG (суюлтирилган газ) етказиб беришнинг қисқариши билан янада мураккаблашди.
Изоҳ (0)