«Газпром» қиш учун газ нархи 4 минг доллардан ошишини прогноз қилмоқда

«Газпром» Европада қиш учун газ нархи 4 минг доллардан ошишини прогноз қилди. Бу ҳақда Коммерсант хабар бермоқда.

Компания ҳисоботига кўра, йил бошидан бери МДҲдан ташқари мамлакатларга экспорт 78,5 млрд кубометрни ташкил этиб, 36,2 фоизга камайган.

Шу билан бирга, Хитойга экспорт ўсишда давом этмоқда. Монополиянинг консерватив деб атаган ҳисоб-китобларига кўра, қишда Европада нархлар минг куб метр учун 4 минг доллардан ошади.

Июль ойи охирида Европада газ нархи кўтарила бошлади ва ҳар минг куб метр учун 2 минг доллардан ошиб кетди. Бунга «Газпром»нинг «Шимолий оқим» орқали етказиб бериш ҳажмини қисқартиргани сабаб бўлди.

Кеча, 15 август куни Европада газ нархи минг куб метр учун 2,5 минг долларга ошиб, рекорд даражага етди.

Иссиқлик ва қурғоқчилик шароитида газ қимматлашиб бормоқда, бу эса дарёлар бўйлаб кўмир етказиб беришни қийинлаштирмоқда.