«Ҳеч кимнинг уйини унинг шахсий розилигисиз тинтув қилиш мумкин эмас» — хонанда Дилфуза Исмоилова конституцияга киритилаётган ўзгартиришларга муносабат билдирди (видео)

Конституциянинг 53-моддаси бўйича таклиф этилаётган лойиҳанинг аҳамияти ва бу ўзгартириш хусусий мулк бошқа мулк шакллари каби дахлсиз ва давлат ҳимоясида эканлигини янада мустаҳкамлаши ҳақида хонанда Дилфуза Исмоилова ўз муносабатини билдирди.

«Ҳаммамиз гувоҳ бўляпмизки, юртимизда конституцияга ўзгартиришлар киритиш бўйича жуда катта ишлар амалга оширилмоқда. Эътиборлиси шуки, бу очиқ-ойдин халқ билан маслаҳатлашган ҳолда бажарилмоқда. Буни халқимиз учун жуда ҳам катта янгилик деб биламан. Шунинг учун хоҳлаган одам ўз таклифини бермоқда. Бу қувонарли ҳолат, чунки одамлар ўз келажагига бефарқ бўлмаяпти. Мен ҳам ўз таклифимни билдирмоқчиман.

Конституцияда ‘Уй-жойга, шахснинг бошқа мол-мулкига унинг рухсатисиз кириш, уларни кўздан кечириш ва тинтув ўтказиш фақат қонунда белгиланган тартибда йўлга қўйилиши белгиланиши даркор’, дейилмоқда. Жуда тўғри, очиқ ва оқилона таклиф. Умуман, ҳар бир инсон мол-мулкига унинг рухсатисиз кириш ва уни тинтув қилиш мумкин эмас. Шу қоида конституцияда белгиланиб қўйилган бўлса, бу давлатнинг яна бир энг асосий кафолатига айланади. Мана, юртимиздаги конституцияга қандай яхши ўзгартиришлар киритилмоқда. Бу биз фуқаролар учун, бизнинг келажагимиз учун. Илоҳим, юртимизда тинчлик бўлсин, соғлиқ-саломатлик бўлсин, юртимиз аҳолиси учун шунақа янги, зўр қонунлар амалга киритилмоқчи, мен ўз миннатдорчилигимни билдираман», — дейди хонанда Дилфуза Исмоилова.

Эслатиб ўтамиз, конституцияга янги 53¹-модда қўшилади:

• Ҳеч бир шахс ўз мол-мулкидан суднинг қарорисиз маҳрум этилиши мумкин эмас. Мулкни жамоат эҳтиёжлари учун мажбурий равишда бошқа шахсга ўтказиш қонунда назарда тутилган алоҳида ҳолларда ҳамда тартибда унинг ўрнини олдиндан ва тенг қийматда қоплаш шарти билан амалга оширилиши мумкин.