«Ҳозир муаммоларимизни ҳал қиладиган давр». Озода Нурсаидова 3 йил аввал уйи бузилганидан азият чеккани ҳамда конституциянинг тегишли моддасига киритилаётган ўзгартириш ҳақида

Конституциянинг 53-моддаси бўйича таклиф этилаётган лойиҳанинг аҳамияти ва бу ўзгартириш хусусий мулк бошқа мулк шакллари каби дахлсиз ва давлат ҳимоясида эканлигини янада мустаҳкамлаши ҳақида «Шуҳрат» медали соҳибаси, хонанда Озода Нурсаидова «Дарё»га ўз мулоҳазаларини билдирди:

«Мен бир мурожаат билан чиқдим, яъни ҳозир ижтимоий тармоқларда конституциямизга ўзгартириш киритиш бўйича таклифларга кўзим тушди. Бир таклиф жуда эътиборимни тортди. Бу конституцияда инсонларнинг мол-мулкини ҳимоя қилиш бўйича берилган таклиф. Тўғриси, менинг бошимдан ўтган, айнан мол-мулким бўйича муаммо бўлган, яъни уч йил олдин уйим бузилган. Мана шу берилган таклиф айни муддао, чунки ҳар бир инсоннинг уй-жойи бу кичкина бир Ватан каби, яъни муқаддас.

Ҳар бир ўзбек борки, биринчи бўлиб уй-жой қилади. Масалан, ижтимоий тармоқларда ҳам ҳаммамизнинг кўзимиз тушади, унинг уйи бузилган, бунинг уйи бузилган, яъни ҳозир бу жуда ҳам долзарб муаммо. Конституциянинг айнан бу бандига ўзгартириш киритилиши мени жуда ҳам қувонтирди. Ўйлайманки, мана шу таклиф фақат таклиф бўлиб қолмайди, Конституцияга киритилади ва кафолатланади. Мана ҳозир айни муддао, мана шу муаммоларимизни ҳал қиладиган давр. Конституцияга ўзгартириш киритилаётган даврда ҳар биримиз ўз муаммомизни айтишимиз керак. Мана шундай воқеаларда қатнашишимиз керак, аслида.

Ўйлайманки, сизлар ҳам ўзларингизнинг фикрларингизни айтасизлар, мен нега сизларга мурожаат қиляпман, мана бу ҳозирги таклиф, таклифни қабул қилиб амалга киритиш учун халқ билан референдум ўтказиб овоз йиғилади, ўрганилади. Демоқчиманки, менга ўхшаб азият чекиб, бошидан кечирганлар кўп, шунинг учун сизлар ҳам қатнашиб овоз беринглар ва фикрларингизни билдиринглар», — дейди хонанда Озода Нурсаидова.

Конституциянинг 53-моддасига қуйидаги ўзгартириш киритиш таклиф этилмоқда.

• Тадбиркорлар қонунчиликда тақиқланмаган ҳар қандай фаолиятни амалга оширишга, ўз фаолиятининг йўналишини мустақил равишда танлашга, тадбиркорликдан чекланмаган миқдорда даромад олишга ҳақли.
• Ўзбекистон Республикасида товарларнинг, хизматларнинг, ишчи кучининг ва молиявий маблағларнинг эркин ҳаракатланиши кафолатланади.
• Иқтисодий фаолиятда инсофсиз рақобатга, монополлаштиришга йўл қўйилмайди.
• Давлат тасарруфидан чиқариш ва хусусийлаштириш натижалари қайта кўриб чиқилмайди ҳамда бекор қилинмайди.

Конституцияга янги 53¹-модда қўшилади:

• Ҳеч бир шахс ўз мол-мулкидан суднинг қарорисиз маҳрум этилиши мумкин эмас. Мулкни жамоат эҳтиёжлари учун мажбурий равишда бошқа шахсга ўтказиш қонунда назарда тутилган алоҳида ҳолларда ҳамда тартибда унинг ўрнини олдиндан ва тенг қийматда қоплаш шарти билан амалга оширилиши мумкин.