Кейинги пайтларда рўмоли билан боғлиқ вазият сабаб кўплаб танқидларга учраган актриса Фарангиз Холиқова айни дамда Туркиядаги «Fashion Academy»да таҳсил олмоқда. «Дарё» мухбири Наргизахон Муродова марҳум ижодкор Ҳусниддин Холиқовнинг қизи билан боғланиб, онлайн интервью ташкил қилди.
Нега айнан Туркия?
— Айни пайтда Истанбул шаҳридаги «Fashion Academy»да таҳсил оляпман. Бу университет эмас, уч йил аввалги орзуларимни амалга ошириш учун курашяпман. Маржона опам айнан Туркияда яшагани учун унинг назоратида ўқишимга рухсат беришган. Аслида унинг қўлига ишониб топширишган, десам ҳам бўлади.
Бундан ташқари, бу ерда тадбиркорлик билан ҳам шуғулланаман. Бу фаолият билан 19-20 ёшимдан буён шуғулланаман. Бекорчиликни жиним суймайди, ҳамиша банд бўлишим керак. Ортиқча даромад ҳеч кимга зарар қилмайди, деб ҳисоблайман.
«Дадам вафот этганида 8 ёшда эдим»
— Болалигим камалакдек ранг-баранг ўтган. Оилада кичик фарзанд бўлганим учун жуда эрка бўлганман. Дадам раҳматли Пеликан, онамлар модель қизим деб эркалашарди.Ёш бўлсам-да, ота-оналарга бир тавсиям бор. Фарзандларига кўпроқ меҳр бериб, рағбатлантириб катта қилишсин. Ҳаётимда кўп тўсиқлардан тик, мағрур ўтишимга, ўша меҳр ва ғурур дастак бўлган.Дадам раҳматли нафақат ҳақиқий истеъдод эгаси, балки энг яхши инсон ҳам эди. Улардан айрилган кунни ҳеч қачон унутолмасам керак. Ўшанда бор-йўғи 8 ёшда эдим. Ҳаётда ҳали кўп нарсаларни тушунмайдиган ёшда бўлсам ҳам энг меҳрибон инсонимдан айрилганимни англаганман.
«Тасодиф сабаб санъатга кириб келганман»
— Онам актриса бўлишимга қарши бўлмаган, аксинча бу борада кўп бор қўллаб-қувватлаган. Аввалига ўзим иккиланганман. Режиссёр Зебо Наврўзова билан бир маҳаллада турардик. Бир куни кўришиб қолганимизда «Клипга суратга тушасанми?» деб сўраган. У пайтда 15 ёшли қиз эдим. Табиийки, менда ҳам санъатга қизиқиш бўлган. Эртаси куни айтилган манзилга келиб, илк ролимни Шоҳруҳхоннинг «Чорла» клипида ижро этганман. Кейин бошқа клипларга ҳам таклиф этишган.
«Бир инсон ҳаётига зомин бўлишни истамадим»
— Мактабни тамомлаш арафасида болалар шифокори бўлишни истардим. У пайтларда академик лицейлар бўларди. Ўқиш жараёнида эса мендан шифокор чиқмаслигини англадим. Чунки кўзим етмаган касбни эгаллаб бир инсоннинг ҳаётига зомин бўлишни истамаганман. Шундан кейин менга Instagram орқали Дурдона Тўлаганова хабар йўллаб, «Журналист» сериалига таклиф этган. Ижром режиссёрга маъқул келган, аммо илк ролим бўлгани учун унда камчиликлар борлигидан кўз юммайман.
«Ўзбекистонда актёрликдан бойиганларни танимайман»
— Актрисалик мен учун ҳобби. Ўзбекистонда яшаётганимда бир ойда 5-6 та фильм ва сериаллардан таклифлар тушарди. Сценарийларни ўқиб, гонорарига қизиқардим. Иккиси ҳам кетган вақтимга арзимаслигини тушуниб етгач, ролларни рад этардим. Актёрларнинг гонорари жуда кам. Баъзида кетган вақтингизга ҳам арзимайди. Шу боисдан ҳам Ўзбекистонда айнан актрисаликнинг ортидан бойиб кетганларни танимайман.
«Жажжи синглим ҳаётимизга нур олиб кирди»
— Икки опам, укам ва синглим бор. Катта опам турмушга чиққан, оиласи ва фарзандлари билан банд. Кейингиси ўқиш ва иши билан машғул. Укам эса доимгидек изланишда. У дадамдек ақлли, компьютер ва тил ўрганишга қизиқади. Синглим эса ҳали жуда кичкина. У ҳаётимизга нур олиб кирган. Кўз тегмасин, оиламиз жуда аҳил. Чунки онам жуда кичиклигимиздан бошлаб бир-биримизни ҳимоя қилиб яшашимиз кераклигини уқтирган.
«Санъат менга керакми ёки йўқ»
— Бир йил аввал Анталяда дам олаётганимда турк сериалига таклиф қилишган. Аммо таклифни рад этганман. Чунки ўша патда хаёлларим жуда чалкаш эди. Ҳозир ҳам истасам, турк сериалларида суратга тушишим мумкин. Чунки инсонда хоҳиш бўлса ҳамма нарса қўлидан келади. Фақат ҳалигача бу менга керакми ёки йўқми деган иккиланиш бор.
«Рўмолимни ғийбат қилиш бандасига эмас»
— Рўмолим сабаб турли гап сўзлар кўпайди. Инсонлар истаганча гапиришди, аммо муҳокама қилиш бандасига эмас эканини унутишди. Ҳар ким ўз бошига ғамни сотиб олар экан. Ортимдан ғийбат қилаётганларни Аллоҳ кечирсин деб дуо қиламан. Илгари одамларнинг гап-сўзларини эшитиб, ранжирдим. Ҳозир эса эътибор ҳам бермайман. Онамнинг гапига қулоқ соламан. Одамларнинг гап сўзидан кўра, яқин инсонингизнинг фикри ва қалбингиздаги хотиржамлик муҳимроқ эканини аллақачон англаб етганман. Агар ундай инсонлар мендек хотиржам ва бахтли бўлганларида ғийбат қилиб юришмасди. Менимча, улардан ранжиш мантиқсизлик бўлса керак.
Бундан ташқари, Фарангиз Холиқова нима учун хонанда Дилсўзга отасининг «Ўзбекистон» қўшиғини ижро этишни тақиқлаганига ҳам ойдинлик киритиб ўтди.
— Ҳа рост, тақиқлаганмиз. Ҳақиқатан ҳам дадамнинг қўшиқларини қизғонаман. Чунки яратилган қўшиқларнинг ортида дадам билан бирга онамнинг ҳам меҳнатлари бор. Қўшиқни ижро этганлари учун тақиқламаганман, фақатгина онамдан бир оғиз сўрамай, бошқа инсонларнинг розилигини олишгани ва ҳеч қаерда қўшиқ дадамники эканини айтишмаганидан ранжигандим.
Мавзуга доир:
Изоҳ (0)