Актёр, юрист, блогер Отабек Маҳкамов «Zo‘r TV» телеканалининг «Ёр-Ёр» кўрсатувига берган интервьюсида китобининг илк нусхасини 15 миллионга сотгани, америкалик қизга уйлангани, ҳозирда эгизак фарзандни тарбия қилаётгани, АҚШдаги ўзбекларнинг тўйдаги урф-одатлари ва оила қуриш тартиби ҳақида гапирди.
Отабек Маҳкамов китобининг илк нусхаси 15 миллионга сотилгани ва унинг ёзилишига «Гарри Поттер» ҳам сабабчи бўлгани ҳақида
« ‘Юксаклик сари тасодиф бўлмаган 1оо та учрашув’ китобимни учта тилда: ўзбек тилида, рус тилида, инглиз тилида ёздим. Китобда охирги 18 йил давомида дунёнинг 52 та давлатида тарихий шахслар билан қандай қилиб танишганим, нималар ҳақида гаплашганим ва энг асосийси — ҳар биридан қанақа ҳаётий сабоқ олганимни айтганман. Баъзиларидан қандай инсон бўлмаслик кераклигини ўргандим, ўзбек халқ мақолларида ҳам бор, одобни одобсиздан ўрган дейилган. Шунақаси ҳам бўлган.
Бу китобни ойимга бағишладим. Чунки бундан 12 йил олдин онам саратон касаллигидан вафот этган. Китобдан биринчи тушган фойда ҳам Ўзбекистонда саратон касаллигига чалинган болаларни даволаш учун ишлатилади. Китобнинг илк нусахасини аукционга қўйиб, 15 миллионга сотдик ва шу пулга дори олиб, саратон касаллигига чалинган болаларга бердик.
Бу китобни ёзишимга яна бир сабабчи инсонлардан бири дунёдаги энг машҳур актёрлардан бири, ‘Гарри Поттер’ фильмининг бош ролларидан бирини ижро этган актёр Дэниэл Редклифф бўлган. Бу инсон билан учрашиб, мен сизнинг ўзбекистонлик ҳамкасбингизман деганимда, кечирасиз, мен Ўзбекистон ҳақида эшитмаганман, деган. Мен эса география ўқитувчингизга салом айтинг, олган ойлигини давлатга қайтариб берсин, дедим.
У билан икки йилдан сўнг кўришиб қолганимда, танимайди деб ўйлаганман, чунки миллионлаб инсонлар билан учрашади, бироқ у узоқдан мени кўриб ўзбекистонлик актёр келяпти деган, олдимга келиб эса биласизми мен география ўқитувчимга саломингизни етказдим, улар менга қўшимча дарс берди, энди Ўзбекистонни биламан, пойтахти Тошкент экан, атрофида 5 та республика бор экан, сизга раҳмат, деди. Гарри Поттер, яъни Дэниэл Редклифф ҳозир Ўзбекистон ҳақида 100 фоиз маълумотга эга», — дейди Отабек Маҳкамов.
Франциялик қизни севган актёр америкалик қизга уйлангани ва эгизак фарзандлари ҳақида
«Севган қизим француз миллатига мансуб эди. У билан кўп йиллар давомида муносабатда бўлганман, лекин, афсуски, шунақа бўлиб қолди, ҳаёт ўзининг қоидаларига эга экан. Ҳозир у бошқа инсон билан турмуш қурган, мен эса ҳақиқатан ҳам америкалик аёл билан турмуш қурганман. Уйланганимга анча бўлди, фарзандларим бор. Улар вояга етмоқда, эгизак фарзандим бор, исми Ҳасан ва Ҳусан. Ҳаммаси яхши. Ҳаётимдаги энг катта фахрим — бу менинг оилам. Шунинг учун мен жуда ҳам бахтиёрман. Турмуш ўртоғим қайси миллатга мансуб бўлмасин, асосийси, биз бир-биримизни тушунамиз, яхши кўрамиз ва ҳурмат қиламиз. Аёлим фарзандларимга ўзбекча исм қўйишга қаршилик билдирмаган, бизда келишув бор», — дейди журналист.
АҚШда ҳам совчилик қадриятига амал қилинадими?
«АҚШда 160 мингга яқин ўзбекистонлик яшайди ва у ерда ҳам совчилик қадрияти бор. Яқинда бир дўстим яхши қиз бўлса, тавсия қилишимни сўради ва мен шундай қилдим, чунки қарасам иккаласининг ҳам феъл-атвори ўхшаш экан. Боланинг исми Тўлқин эди. У тавсия учун раҳмат, лекин менинг ота-онам АҚШда эмас, шунинг учун совчиликка ўзинг борасан, деди. Ҳаётимда шунча иш қилиб, совчиликка бормаган эканман. Совчиликка боришга тўғри келди ва ҳозирда улар Нью-Йоркдаги энг бахтли оилалардан бири», — дейди актёр.
Отабек Маҳкамов «Ёр-Ёр»га ўхшаган кўрсатувлар АҚШда ҳам борлиги ҳақида
«Ҳозир ‘Ёр-ёр’га ўхшаган кўрсатув АҚШда, Россияда, дунёнинг ҳар бир мамлакатида бор, чунки бу каби кўрсатувларнинг бўлгани яхши. Бу кўрсатув ‘Москва кўзёшларга ишонмайди’ фильмига ўхшаб кетади, унда ҳам бош қаҳрамон турмуш қуриш учун агентликка мурожаат қилади. Бу каби кўрсатувлар бор ва борлиги жуда катта плюс», — дейди Отабек Маҳкамов.
АҚШда оила қуриш тартиби, у ерда ўзбеклар тўйда миллий либосда кийиниши ва фарзандлар оила қургандан сўнг алоҳида яшаши ҳақида
«АҚШда ёшлар бир-бири билан ўзи танишади. Масалан, жияним Австралияда британиялик инсон билан турмуш қурди. Бу ҳақда тўйидан бир ҳафта олдин ота-онасига айтган. АҚШда ҳам худди шунақа қоида, лекин ўзбеклар яшаётган жойда деярли ҳамма ёшларнинг ота-онасининг ўзи топади. У ердаги тўйларга борганда олдин унча эътибор бермас эдим, ҳамма аёллар атлас кўйлак кияди, эркаклар эса дўппида. Ўзбекистонда, айниқса, Тошкентдаги тўйларда европаликларнинг кийимни кийишади. Биз у ерда ватанимизни, урф-одатларимизни соғинамиз, шунинг учун ҳам тўйларда миллий либосда бўламиз.
АҚШда деярли барча фарзандлар оила қургандан кейин алоҳида уйга чиқиб кетади. Ота-онаси тирик бўлса, уларнинг ҳам ўз ҳаёти бўлади. Агар ота ёки она ёлғиз қолган бўлса, улар бирга яшашади. АҚШда шахсий ҳаёт, шахсий чегара деган нарса катта рол ўйнайди, ҳар бир оила алоҳида яшаши шарт», — дейди актёр.
Мавзуга доир: Полиглот машҳурлар: Ўзбек шоу-бизнесининг бир нечта тилда эркин гаплаша оладиган вакиллари (фото)
Изоҳ (0)