Жорий йилдан бошлаб олий таълим муассасаларининг магистратура йўналишига кириш учун чет тили сертификати талаб этилмоқда. Сертификат ва зарур ҳужжатлари бўлса, талабгор имтиҳонсиз магистрантга айланади. Олий ва ўрта махсус таълим вазири Абдуқодир Тошқулов кўпчиликда норозилик уйғотган мазкур қарорга изоҳ бериб, хорижий тил сертификати нима учун талаб этилаётгани ҳақида гапирди.
Абдуқодир Тошқуловнинг айтишича, олий таълимда сифат бўлиши учун чет тилларини билиши муҳим.
«Бу йил магистратурага квоталар сони 16 мингта бўлса, 11 мингтага яқин ҳужжат топиширилди. Қабуллар эса бир йилда икки марта ўтказилади. Кўпчилик санъат ёки спорт соҳасидагиларга чет тили нега керак дейди. Агар Равшан Эрматов инглиз тилини мукаммал билмаганида, халқаро тоифадаги рефери бўла олмас эди. Албатта, профессионализм ҳам бор, лекин тил ҳам муҳим.
Ҳозирги олимларимиз рус тилидан фойдаланади. Лекин келажак олимлари инглиз тилидаги базадан фойдаланишга мажбур. Бу масалани муҳокама қилаётган одамлар билиши керакки, давлат ва жамият болаларга дарс берадиган устоз кучли билимга эга бўлишини хоҳламоқда. Магистратура ҳар ким ҳам ўқий оладиган жой эмас. Олий таълимда сифат бўлиши учун қанақа соҳада ишлашидан қатъи назар, керак бўлса, француз, испан, форс тилини ҳам билиши керак. Ўргансин.
7,5 баллик чет тили сертификатига эга болага умуман хорижий тил сертификати бўлмаган ўқитувчи қандай дарс беради? У устозидан кўп ва янги маълумотларга эгаку. Унда мукаммалроқ билим бўлса, ўқитувчи дарсга кириб унга нимани гапиради? Шунинг учун бу талаб айни вақтида қилинди. Шу пайтгача тизим ихтиёрий қилиб қўйилди, ўзгариш жуда ҳам кам бўлди. Ҳозир магистратурада коррупция 100 фоиз йўқ. Сертификат билан ҳужжатлар қабул қилинади. Дипломининг ўртача балли ҳисобланади ва абитуриент инсон омилисиз магистратурага қабул қилинади», – деди вазир.
Аввалроқ Абдуқодир Тошқулов магистратура қабулига топширилаётган чет тили сертификатларининг 70 фоизи сохта бўлиб чиқаётганини айтганди.
Изоҳ (1)
Til sertifikati haqqoniy ish bo'ldi. Bunga qo'shilamiz. Ammo, nega spes(o'z sohasiga doir) fanlardan imtihon olish bekor qilindi? Hozir o'zbek universitet institutlarida pul yoki tanish-bilish bilan 3 ni 4 yoki 5 qilish qiyin narsa emas. Diplom ballari studentni haqiqiy bilimini baholay oladimi? Shuni o'ylash kerak. Xuddiki, bu muammoga ko'z yumilmoqda. "Magistratura harkim o'qiy oladigan joy emas!"