Ўзбекистонда 700 нафарга яқин беморда эндопротезлаш амалиётлари бепул ўтказилди. Бу ҳақда Соғлиқни сақлаш вазирлиги матбуот хизмати хабар берди.
Таъкидланишича, сон суяги, елка, тизза бўғимларининг емирилиши билан боғлиқ хасталикларни даволашда қўлланиладиган, қиймати 18 миллион сўмга тенг бўлган эндопротез мосламаларини оддий аҳоли харид қилишга қийналади.
Шу боис Соғлиқни сақлаш вазирлиги томонидан 2022 йилнинг ўтган даврида жойларда ташкил этилган соғломлаштириш акциялари давомида 670 нафар шундай беморда чаноқ-сон бўғими, 28 нафарида тизза бўғимини эндопротезлаш операциялари бепул ўтказилди.
Қолаверса, авваллари фақатгина Тошкентда бажарилган буйрак трансплантацияси операциялари соғломлаштириш акциялари доирасида туманлар даражасига туширилди. Натижада 95 нафар беморга буйрак кўчириб ўтказилди. Хусусан, Қорақалпоғистоннинг Беруний тумани ҳамда Сурхондарё вилоятининг Денов тумани марказий шифохоналарида бажарилган бундай мураккаб амалиётларга пойтахтлик етук жарроҳлар бошчилик қилди.
Шунингдек, 640 нафар туғма юрак нуқсони билан оғриган бемор болалар жарроҳлик амалиётлари орқали соғломлаштирилди. Вазирлик томонидан ҳудудлар бўйлаб ташкил этилган тиббий кўрикларда юқори технологияли операцияларга муҳтож 13 минг нафар бемор рўйхати шакллантирилган. Йил якунига қадар уларнинг 11 минг нафарини ҳудудларнинг ўзида, 2 минг нафарини эса республика тиббиёт муассасаларида соғломлаштириш режалаштирилган.
Изоҳ (0)