Олий Мажлис Қонунчилик палатасида 15 август куни Экологик партия фракциясининг навбатдаги йиғилиши бўлиб ўтди. Унда фракция аъзолари томонидан дастлаб «Ўсимликларни ҳимоя қилиш тўғрисида»ги қонун лойиҳаси биринчи ўқишда муҳокама этилди.
Таъкидланишича, минерал ўғитлар ҳамда кимёвий воситалар биологик фаол бирикмалар бўлиб, улар билан ишлаш қоидаларининг бузилиши инсон саломатлигига, ўсимлик ва ҳайвонот дунёсига жиддий зарар келтиради, озиқ-овқат маҳсулотларинг сифатини пасайтиради. Қишлоқ хўжалигида минерал ўғитлар ва кимёвий воситалардан фойдаланишнинг кенгайиш тенденциясини ҳисобга олган ҳолда хавфли кимёвий моддаларнинг қишлоқ хўжалигига таъсирини мақбул хавф даражасига қадар камайтиришни тақозо этмоқда.
Мазкур қонун лойиҳасида ўсимликларни ҳимоя қилиш соҳасини тартибга солиш, ўсимликларни ҳимоя қилиш соҳасидаги давлат бошқаруви ва назорати, ўсимликларни ҳимоя қилиш воситалариларига қўйиладиган хавфсизлик талаблари, кимёвий моддалар, биологик воситалар ва материалларни сақлаш, қўллаш, зарарсизлантириш, йўқ қилиб юбориш, утилизация қилиш, ташиш ва кўмиб ташлашга доир масалаларни тартибга солиш назарда тутилмоқда.
Қонун лойиҳасининг қабул қилиниши натижасида минерал ўғитлар ва ўсимликларни ҳимоя қилиш воситаларини мамлакат ҳудудига олиб киришдан бошлаб уларни муомаладан чиқаришгача ҳисобга олиш ва мониторинг қилиш таъминланади ҳамда улардан тўғри фойдаланиш назорат қилинади.
Йиғилишда қонун лойиҳаси юзасидан фракциянинг таклиф ва мулоҳазалари билдирилиб, қўллаб-қувватланди. Шундан сўнг фракция аъзолари томонидан «Рақобат тўғрисида»ги, «Волонтёрлик фаолияти тўғрисида»ги Ўзбекистон Республикасининг қонунига волонтёрлик фаолияти соҳасида давлат бошқарувини такомиллаштиришга қаратилган ўзгартиш ва қўшимчалар киритиш ҳақида»ги қонун лойиҳалари муҳокама этилиб, кун тартибидаги масалалар юзасидан тегишли қарор қабул қилинди.
Изоҳ (0)