Ўзбекистондаги «Баркамол авлод» болалар мактаблари ходимлари ва тўгарак раҳбарларининг иш ҳақлари босқичма-босқич оширилади. Бу ҳақда «Мактабдан ташқари таълим тизимини ривожлантириш дастурини амалга ошириш чора-тадбирлари тўғрисида»ги президент қарори лойиҳасида белгилаб қўйилмоқда.
Қарор лойиҳасига кўра, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари, Халқ таълими вазирлигига 2023 йил 1 январдан бошлаб маҳаллий бюджет маблағлари ҳисобидан халқаро тадбирларда ғолиб бўлган «Баркамол авлод» болалар мактабларига тўгарак аъзоларини рағбатлантириш тизимини йўлга қўйиш вазифаси топширилди.
Бунда, халқаро тадбирлар ғолиблари ва уларнинг ўқитувчилари БҲМнинг қуйидаги миқдорларида бир марталик пул мукофотлари билан тақдирланади:
- 1-ўрин (олтин медал) учун — 15 (4,5 миллион сўм), ўқитувчисига — 12 баравари (2,5 миллион сўм);
- 2-ўрин (кумуш медал) учун — 10 (3 миллион сўм), ўқитувчисига — 8 баравари (2,4 миллион сўм);
- 3-ўрин (бронза медал) учун — 8 (2,4 миллион сўм), ўқитувчисига — 6 (1,6 миллион сўм) баравари;
- лауреат учун — 6 (1,6 миллион сўм), ўқитувчисига — 4 баравари (1,2 миллион сўм).
Шунингдек, 2027 йилдан бошлаб ўқувчилар сони кўп бўлган туман (шаҳар)ларда талабдан келиб чиққан ҳолда қўшимча «Баркамол авлод» болалар мактабларини ташкил этиш режалаштирилган.
Изоҳ (0)