Ижтимоий тармоқларда Сирдарё вилояти Гулистон шаҳри 3-мавзе бозорча ҳудудидаги дарахтларнинг таг қисми бетонлаб кетилгани ҳақида хабарлар тарқалди. Вилоят Экология ва атроф-муҳитни муҳофаза қилиш бошқармаси ҳолатга муносабат билдирди.
Қайд этилишича, ушбу хабар юзасидан Гулистон шаҳар экология бўлими инспекторлари ҳамда ИИБ ходимлари томонидан воқеа жойига бориб ўрганиш ишлари олиб борилган. Ўрганиш давомида Гулистон шаҳар 3-мавзе бозорча ҳудудида бир нечта дарахтларнинг таг қисми бетонлаб ташланган ҳолати аниқланган.
Ҳолат юзасидан дўкон эгаларини топиб, дарахтларнинг таг қисмлари очилиб, муаммо бартараф қилинган. Бундай ҳолат такрор содир этилмаслиги юзасидан давлат инспекторлари томонидан тарғибот ишлари олиб борилган.
«Шу ўринда ҳурматли тадбиркорларимиздан бизга тоза ва мусаффо ҳавони етказиб бераётган яшил дарахтларимни асраб-авайлашларини сўраб қолардик», — дейилади хабарда.
Изоҳ (0)