«Коврак масаласида икки қишлоқ аҳолиси эмас, икки корхона ишчилари тортишган». Деҳқонобод ҳокимлиги тарқалган хабарга аниқлик киритди

Деҳқонобод тумани ҳокимлиги «Деҳқонободда икки қишлоқ аҳолиси ўртасида жанжал юз берди», сарлавҳали хабарни рад этиб, ҳолатга аниқлик киритди. Таъкидланишича, туманда юз берган жанжал икки қишлоқ аҳолиси ўртасида эмас, икки корхона вакиллари орасида содир бўлган.

«Жанжал ‘Наргиз-Сарвар’ хусусий корхонаси ишчиси ва Деҳқонобод ковракчилик кластери ходими ўртасида содир бўлган. Жанжалга коврак ширасини йиғиб олиш бўйича берилган квотадаги англашилмовчилик сабаб бўлган. Мазкур ҳолат туман ИИБ томонидан ўрганилиб, қонуний тўхтамга келиш учун дастлабки тергов-суриштирув ишлари олиб борилмоқда», — дейилади ҳокимлик раддиясида.

Маълум қилинишича, туманда фаолият юритаётган «Наргиз-Сарвар» хусусий корхонасига туман ҳокимининг 2015 йил 4 февралдаги қарорига асосан Кўҳистон ковраги ўсимлигини кўпайтириш ва доривор ўсимликлар етиштириш мақсадида 450 гектар ер майдони 42 йил муддатга ижарага берилган. Бу ҳақда 2015 йил 26 май куни ижара шартномаси тузилиб туман Ер ресурслари ва давлат кадастри бўлими томонидан ер майдонлари жойида ўлчаниб, хариталаштирилган. Узоқ муддатли шартнома Вазирлар Маҳкамасининг 2014 йил 7 январдаги қарори асосида «Ермулккадастр» ДК томонидан 2015 йил 26 май куни давлат рўйхатидан ўтказилган. Вазирлар Маҳкамасининг 2018 йил 28 декабрдаги қарорига асосан Давлат кадастрлари палатаси Қашқадарё вилоят бошқармаси томонидан Кадастр ва кўчмас мулкни давлат рўйхатидан ўтказиш интеграцион ахборот тизими орқали 2021 йил 6 декабрь куни давлат рўйхатидан ўтказилган.

«Президентнинг 2020 йил 2 сентябрдаги ‘Ўзбекистон Республикасида пиллачилик ва чорвачиликни янада ривожлантириш чора-тадбирлари тўғрисидаъги Фармони ижросини таъминлаш мақсадида туман ҳокимининг 2020 йил 2 октябрдаги ‘Тумандаги мавжуд яйлов ер майдонларини Ўзбекистон Республикаси Пиллачилик ва қоракўлчиликни ривожлантириш қўмитасининг доимий эгалигига ўтказиш тўғрисидаъги қарори қабул қилиниб жами 177 минг 29 гектар яйлов ер майдонлари қўмита ихтиёрига ўтказилган ва ковракчилик кластери ташкил этилган.

Кейинчалик туманда фаолият юритиб келаётган ‘Наргиз-Сарвар’ ХК, ‘Нурислом-Сардор файз’ ХК, ‘Қумпайкал мўъжизаси’ ХК, ‘Big био импех’ МЧЖ, ‘Муҳаммадиёр Раҳимов’ ХК, ‘Пиннаcле wорлwиде эхим’ МЧЖларнинг суд органларига қилган даъво аризаларига кўра юқорида қайд қилинган 6 та субъектга ажратилган жами 2826 гектар ер майдони тегишли суд органлари қарорларига асосан қўмита ҳисобидан қайтариб берилган», — дейди ҳокимлик масъуллари.

Қўшимча қилинишича, айни пайтда ҳолат Экология қўмитаси, вилоят Экология бошқармаси ва туман бўлими, туман ҳокимлиги, туман прокуратура, адлия, туман ИИБ, туман қишлоқ хўжалиги бўлими, туман меҳнат ва бандлик бўлими, кадастр палатасининг туман филиали масъуллари иштирокида ўрганилмоқда.