Ака Шариф — Толиб Ҳожиев бир вақтлар пул топиш учун массажчилик қилгани, ғишт қуйгани ҳамда бир ўлимдан қолгани ҳақида (видео)

Актёр Толиб Ҳожиев «Севимли» телеканалининг «Машҳурлар» кўрсатувига берган интервьюсида санъатга кириб келган илк йилларида массажчи бўлгани, бу орқали қанча ишлаб топгани, театрдаги ойлик маоши, мардикор бозорига боргани, ғишт қуйиб сотгани, ўпкасининг 95 фоизи касалланиб тузалгани ҳақида гапириб берди.

Толиб Ҳожиев санъатга кириб келган илк йилларида массажчи бўлгани ва бу орқали қанча маблағ ишлагани ҳақида 

«Бир нарсани айтмоқчиман, санъатга кириб келган йилларим жуда оғир бўлган. Ҳаммомда массажчи бўлганман, якшанба кунлари бориб шу ерда ишлардим. Ўша пайтда бир кишини массаж қилиш 10 сўм эди, мен шу нархни 15-20 сўмга чиқардим, чунки ёш эдим, даладан келганман, қўлларим темирдек эди.

Инсонларнинг танасида оғриқ нуқталари бор. Мен шуларни ўрганиб чиқдим, ҳар босганимда овоз чиқаришарди, кейин таърифим кетди, қўли енгил экан дейишган», — дейди актёр.

Актёр мардикор бозорига боргани, ғишт қуйиб сотгани ва театрдан қанча ойлик олгани ҳақида 

«Кейин эсимда, душанба куни театрга ўтиб иш бошладим. Ўша кундан кейин ҳар душанба аёлим эрталаб олтида турғизарди. Шу пайтлари Ҳамза театрининг орқасидаги ётоқхонада турардик. Биз уни ётоқхона эмас, ижодий ёшлар уйи дердик. Чунки ўша пайтда ҳам ғуруримиз жойида бўлган.

Кейин мардикор бозоридаги энг оғир иш ғишт қуйиш эди. Бир кунда мингта ғишт қуйилса, 25 сўм беришган. Мен бир кунда 3000 та ғишт қуйганман. Ғишт қуйишдан 75 сўм топардим, театрдан эса 82 сўм маош олар эдим», — дейди Толиб Ҳожиев.

Қаттиқ касал бўлиб қолган ва ўпкасининг 95 фоизи касалланиб тузалган, ҳаётдан умидини узмаган актёр

«Ҳаёт ширин, унда яшаш завқли. Агар бўйнингиздан ўлим чангалласа, буни янада яхшироқ англар экансиз. Ўпкамнинг 95 фоизи зарарланди, бу дегани жонни сақлаб қолишнинг иложи йўқ, дегани эди. Ўлим дарвозасига етишимга сал қолган эди, шунинг учун бу яшаётган дамларимиз ҳам ғанимат. Бу кунларнинг қадрига етиб яшаш керак. Бекорчи ишларни қилмаслик, нотўғри йўллардан юрмаслик керак. Чунки ўлим ҳақ. Қон-томирларим узилиб, ўпкамнинг 95 фоизи зарарланганди. Наркоздан кейин кўзимни очдим, тасаввурга сиғмайди», — дейди актёр.