Ижтимоий тармоқларда ички ишлар органи ходимлари ва аёл киши ўртасидаги можаро юз бергани айтилган хабарлар тарқалди. Тошкент шаҳар Ички ишлар бош бошқармаси ҳолатга муносабат билдирди.
Қайд этилишича, жорий йилнинг июнь—июль ойларида Шайхонтоҳур туманидаги Кўкалдош мадрасаси олдида фуқаро Д.Б. белгиланмаган жойда полиз маҳсулотларини сотаётгани аниқланган. Унга Чорсу бозори ҳудуди ичидаги расталарда савдо қилиши учун жой таклиф қилиниб, ноқонуний савдо қилмаслиги юзасидан бир неча бор огоҳлантирилган.
Шунга қарамай, белгиланмаган жойда, яъни пиёдалар юриши учун мўлжалланган йўлакда савдо қилишни давом эттирган. Бу каби белгиланмаган жойларда ноқонуний савдо қилинаётгани ҳолати юзасидан шаҳар аҳолиси томонидан кўплаб эътирозлар тушган.
4 июль куни фуқаро Д.Б. рухсат этилмаган жойда яна савдо қилаётгани аниқланган ва ҳудудда хизмат олиб бораётган ППХ инспекторлари томонидан белгиланмаган жойда ноқонуний савдо қилмаслиги юзасидан тушунтириш ўтказилган. Шунда Д.Б. ходимлар билан қўпол муомалада бўлиб, ходимларни ҳақорат қилган, оқибатда улар ўртасида ўзаро можаро юзага келган.
Д.Б. яқин орадаги ИИБга олиб борилиб, тегишли ҳужжатлар расмийлаштирилган. ППХ ходимлари фуқаро билан қўпол муомалада бўлгани ҳолати юзасидан Тошкент шаҳар ИИББ томонидан хизмат текшируви ўтказилмоқда. Текширув якуни ҳақида қўшимча маълумот берилади.
Мавзуга доир:
Изоҳ (0)