Навоий, Қашқадарё, Сирдарё вилоятлари экология ва атроф-муҳитни муҳофаза қилиш бошқарма бошлиқлари ишдан олинди. Бу ҳақда Давлат экология қўмитаси матбуот хизмати хабар берди.
Хабарда айтилишича, қўмита томонидан ўтказилган навбатдаги йиғилишда 2022 йилнинг ўтган давр мобайнида эришилган ютуқлар ва йўл қўйилган камчиликлар кўриб чиқилди. Ижобий натижалар эътироф этилиб, камчиликлар танқид қилинди.
Йиғилишда экология соҳасига оид қонунлар ва президент фармон ва қарорлари ижросининг бажарилиши ҳамда «Яшил макон» умуммиллий лойиҳаси доирасида амалга оширилган ишлар ва мамлакатимизда чиқинди соҳасида қилинаётган ишларнинг бажарилиш каби масалалар муҳокама қилинди.
Танқидий-таҳлилий руҳда ўтган йиғилишда ўз ишига масъулиятсизлик билан ёндашган Навоий, Қашқадарё, Сирдарё вилоятлари экология ва атроф-муҳитни муҳофаза қилиш бошқарма бошлиқлари ишдан олинди.
Шунингдек, Давлат экология қўмитаси марказий аппаратининг уч нафар масъул ходимларига, «Яшил макон» умуммиллий лойиҳасига бевосита масъул бўлган уч нафар ҳудудий бошқарма бошлиқларининг биринчи ўринбосарларига ва чиқинди соҳасини бошқаришга масъул бўлган ҳудудий бошқарма бошлиқларининг иккинчи ўринбосарларига ҳайфсан интизомий чоралари қўлланилди.
Бундан аввал дарахтларнинг нобуд қилиниши масаласи ортидан Тошкент шаҳар Чилонзор тумани ҳокими Шавкат Мавлонов ва прокурори Иззатилла Бозоров лавозимидан озод этилганди.
Мавзуга доир: Тошкентда экологик рейд бошланди
Изоҳ (0)